13 Tesema 2024 Samoa: Ua faaleo e le tasi o faiupu a le itumalo o Safata, Tuia Paepae Letoa, e le’o iai se manatu o le latou komiti e faia se tagi faasaga ile pa’ulia ai o le vaa ole malo o Niusila i le gataifale o Safata.
Na fesiligia le afioaga a Tuia ina ua tatou feiloa’i atu iai ananafi ile fale faamasino, ile mataupu lea.
Peita’i na ia tali mai, ua iai le komiti a le itumalo, ma le leai se manatu o le komiti e su se malo poo se isi.
O le manaoga ia galulue faatasi. Ua iai foi le komiti a le itumalo o gafa ma le mataupu lea.
Peita’i ua taunuu ai le au popoto faapitoa mai Niusila mo le aveesea mai lea o le suauu mai le vaa.
Ae ua faatuai ona faatino lea laasaga talu o loo faatali le vaa toso vaa ma le lanisi e faaaoga ile galuega lea.
O le itu lea ua galulue faatasi ai le malo o Samoa ma le vaega fapitoa o le gataifale a NIusila, e aofia ai ma le ofisa suesue a Samoa le Sros ile suesueina o suasami ile gataifale o pa’ulia ai le vaa o le Manawanui.
E manatu le auvaa a NIusila ma le vaega suesue, talu mai le taimi na afatia ai le vaa lea, e leai lava se suauu ua oo ane i matafaga poo togatogo. TAlu o le au e agai i saute ma e tafia atu foi iai ma le lala o le sami mai le sinasina o loo molimauina ae i tane suauu ole vaa.
Ae o ta’ua e le faatonu o le puipuiga o le gataifale o Niusila, Mr Brown, o le’a taumafai e aveese suauu mai tane, ona faatoa taumafai ai lea ose faiga e aveese le vaa. Ae afai e mana’o lava Samoa e aveese le vaa , lona uiga e fai sina umi e faatali ai, fua ile saogalemu o tagata faigaluega.
Talu le aafiaga o le gataifale ile suauu o mama mai tane, e oo mai nei o loo tapu ona toe fagotaina le gataifale o lea itumalo.
Ma tatou molimauina le faatau I’a atu iai o le au faipisinii o vaa I’a mai le atu Falealili, e la’u a latou kula I’a i SAfata e faatau ai.
