“Ua mafai lava e leoleo i Savaii ona faatino a latou osofaiga ma teuteu le lotoifale o mataupu faapea.” ole tali mai lea a le afioga i le Komesina ole Matagaluega o Leoleo ma Falepuipui, Auapaa Logoitino Filipo ina ua tatou fesiligia.
Peita’i na ia faamaonia mai o le osofaiga lea na tupu ile nuu o Salelavalu, ina ua lipotia ane e tagata lava o le nuu, le togalaau marijuana.
Ma tapena ai loa le osofaiga, ma maua ai le tusa o le 35 laau, i le faatoaga muamua na taunuu iai. O lesi to’agalaau lea na lavevea ane ai leoleo, e to’alua, e le’o iloa se tele pe o nisi faamatalaga auiliili iai.
Talu na toe fo’i ese mai leoleo i tai ina ua lagona le pa ole fana. O le fana ituaiga o le 12 na faasaga ane i leoleo, le ituaiga e salalau solo pulu pe’a fana mamao. Ma aafia ai leoleo e to’alua. O na leoleo na avatu lava i le falema’i i Tuasivi ile Aso Toonai , togafiti ma toe o i tua.
Saunoa foi le Komesina, e le’i iai se mana’o o leoleo e faatau matatao atu ile tali ane a le aufai faatoaga laau faasa. E iai foi isi auala e faailemu ai le mataupu lenei.
E talanoa mai le Afioga a Auapaau, mai lona maota i Upolu, ae o Savaii o loo tupu ai le faaletonu i leoleo ma le va ma le afioga o Salelavalu. Ae le’o le taimi muamua fo’i lea ua alu ai se osofaiga faapea a leoleo Savaii.
E talu mai ai nei le osofaiga na alu foi ile vaotele ma fafai ane ai le toaga laau marijuana sa toto faatasi lava ma le mau’maga i gauta o le Vaotele. Peita’i e fai si va mamao ole Vaotele ma le nuu lea ua maona ane ai lesi faatoaga lea ua manunu’a mai ai leoleo.
E le’o iloa ai ile taimi nei se tau faatusa o laau lea na maua ane i tai ile ASo Toonai, ma lesi togalaau ua le oo iai leoleo ona o le puipuiga o le filemu ma le saogalemu o soifua o leoleo.
Ae ua agia mai i luga o le FB a leoleo, alii e to’atolu ole afioga o masalomia, ua mana’omia e leoleo, e aofia ai: Manuia Lafaele, Masina Lega Taulelei ma Apisaloma Setu.
Ma e le na’o le pau lea o alii o loo sailia e leoleo i le taimi nei, pei ona saunoa le afioga ile Komesina. Ua avatu foi le talosaga i le afioaga, e galulue faatasi ai ma le matagaluegao leoleo, e ala ile tafi esea o fualaau faasaina, mai nuu ma le tatou atunuu.
E le’o toe tuumamaina lava foi e le faamasinoga faasalaga mo tagata e faamaonia lo latou faatau o marijuana ma le aisa i Samoa.
Ae ole Aso Gafua lea e toe feilo’ai ai le afioaga o Salelavalu ma sui o le Matagaluega o leoleo , e soalaupule le mataupu o ta’ua i luga.
