E tala seseina le tama’i vaa, pei se alia fagota, lea na malaga mai Amerika Samoa ile aso 26 o Aperila e faamoemoe mo Savaii.
Ile taunuuga ole tatou suesuega, e le’i solitulafono le taunuu mai ai o le Vaa mai Tutuila ma lana uta.
Ua faamonia mai e le tatou paaga i totonu o le Matagaluega o Tiute, ina ua tatou fesiligia, “sa faatino lava le tiute masani,” ae na muamua faatino le itute ale Matagaluega o le Soifua maloloina.
Ma logo ai isi vaega pei o le Custom ma le Quarantine.
Na fesiligia foi e lau Radio Polynesia le Ofisa o le Soifua maloloina, ile mataupu lava lea.
Ma saunoa le alii ofisa na gafa ma le siakiina o le vaa, o latou “na taunuu mai lava le vaa ma le latou pepa e faatino ai le siaki ole Soifua maloloina.
“Ma faasolo atu ai i isi matagaluega masani pei o le Custom ma le Quarantine.”
“Ole vaa lea na taunuu poo le 11 ile taeao, o lea aso, ae o le faagaioina o tulaga masani ai, na alu ese ai le vaa tusa o le lima ile afiafo o lea aso ma le faamoemoe mo Salelologa.
Peita’i o loo tuuaia le pulega o uafu i Matautu i le “tuai ona latou logo le uafu I Salelologa ua afua ai ona faate’ia le pulega ole uafu i Salafai” ma tupu ai le vevesi. E lei maua le Ofisa sili o le pulega o Uafu, tofa Sooalo Kuresa i lona ofisa ile taimi na tatou telefoni atu iai mo sona finagalo.
Peita’i ole talitonuga o sui o matagaluega a le Tiute ma le Soifua maloloina, e le’i solitulafono le malaga atu a le vaa i Salelologa, ona “sa afe le vaa i Matautu” faatino ai a latou siaki masani
Ae ua faate’ia foi latou ina ua salalau atu tala, a nisi o ofisa faasalalau, e oo lava ile afioga ile Palemia na ia saunoa, ua faatonu matagaluega o fitoitonu iai le matupu lea ia faia iai se suesuega.
I le tatou faatalanoaga ma le ofisa o le Tiute poo le Custom, sa uia uma lava auala e tatau ai e le vaa, ina ua afea le uafu I Matautu.
E taunuu le vaa tusa o le 11 ile taeao, ma logo ai loa matagaluega masani ai.
O taua e le alii ofisa o le Matagaluega o le soifua maloloina o latou lava na muamua fai le latou siaki faasolo ane ai isi vaega. Ma faatoa alu ese ai le vaa tusa o le lima ile afiafi ina ua uma tiute a isi vaega.”
