E lei tuua e le tamalii o Samoa le susuga ia Lupesoliai La’aulialemalietoa Joseph Parker se avanoa i lana paga le alii mai Saina ia Zhilei Zhang po’o Big Bang i le la iloiloga i totonu o le malae fusu i le faaiuga o le vaiaso.
O le alii fusu mai Saina e 40 tausaga, sa pine siliva i Ta’aloga o le Olimipeka i le faipelega i le 2008 ae o le alii fusu mai Samoa ma Niusila ia Lupesoliai e 32 tausaga o lona soifua.
Peitai e ui na iai taamilosaga na pa’ū fa’alua ai Lupesoliai, ona o le mālolosi o tu’i a lea ali’i tino ‘ese mai Saina pe’ita’i na to’a lava, ma finau mo se ai auā le tapuā’iga a ona ‘āiga, fa’apea ona atunu’u ma i latou o lo’o lagolagoina lona taumafai, aemaise o le ta’uleleia o lona lumana’i i lea fa’agatama.
I le fa’atulagaina o ‘ai, mo Lupesoliai o ona ‘ai mai fa’amasino e to’atolu, e 113, 114 ma le 115 a’o Zhang sa ia maua ai e 113, 112 ma le 111.
O Zhang, e 29 ana fusuaga fa’apolōfesa, 26 ana manumālō, 2 faiā’ina, 1 le tutusa ae 21 tu’i oti, a’o Lupesoliai e 38 ana fusuaga fa’apolōfesa, 35 manumālō, 3 faiā’ina ae 23 tu’i oti.
O se taimi muamua lea sa umia ai e le alii fusu mai Saina le Fusi o le Paga Mamafa a le Lalolagi i le Faipelega (W.B.O. Interim World Heavyweight title) ma o le mae’a ai o le la iloiloga ma Lupesoliai, ma se’ia ai lena fusi.
