E le’o amanaia e le Minisita o Galuega, Malaevaalele, Uafu, Suavai, EPC ma le Pulega o felaua’iga i luga o le laueleele, Afioga a Olo Afoa Fiti Vaai, saunoaga a le faipule ole itumalo o Lepa, le taitai ole itu agai, HRPP, Susuga Tuilaepa Sailele Malielegaoi faasaga ia te ia ma le taavale o fealua’i ai nei, le Land Cruiser.
I le toe tuliloaina o le mataupu lava lea na tatou fesiligia ai Olo, i lana tagi ua taatia atu ai nei i leoleo ma ua oo atu ile Ofisa o le Loia Sili mo le faia o moliga faasaga ia Tuilaepa. Peita’i ua tolaulau e Tuilaepa lona fiafia i ana molimau o loo iai, e aofia ai ma le laisene o le Landcruiser e le’o alu i luga o le malo.
Saunoa Olo, ua i leoleo le la mataupu, ae tu’u ai pea e fusu tagi mai ai pea.
I le faatalanoaga lea a le Taitai o le Itu Agai, ua agia i luga fesootaiga televave, o loo fautuaina ai e Tuilaepa ia Olo e oso paga, aua le fia oso atu i luga.
O faamaumauga o le laisene ma le lesitala o le Land Cruiser a Olo lea e faamatala e Tuilaepa i Tusitala, o loo lesitala i luga o le MWTI, Matagaluega o Galuega.
