E toa 20 le aofaiga o leoleo ua faamavae ese mai le Matagaluega o leoleo i lenei tausaga pei ona ta’ua e le Komesina o leoleo le afioga Auapaau Logoitino Filipo i lana lipoti o le au faauu i le aso Tofi o le vaiaso nei.
O nisi oi latou na ua faamavae ina ua faamanuiaina i le se’i faaletausaga a Niusila, o nisi ua malaga ona o galuega faavaitaimi, o nisi ua maua avanoa i nisi o Matagaluega o le malo, poo le nonofo ona o mafuaaga faale aiga.
Saunoa Auapaau o le toa 48 o alii ma tamaitai leoleo lea na faauu ile aso Tofi, na maua o latou avanoa ina ua faasalalau avanoa faaleoleo e 80 a le Matagaluega.
Ma filifili mai ai le toa 54 na aoaoina i totonu o le 17 vaiaso o toleniga ma aoaoga, peitai toe faamaamulu le isi toa 6 ona o fuafuaga faaleaiga ona totoe mai ai lea o le toa 48 o le 31 o tamaitai ae 17 o alii.
O le vasega faauu lona lua foi lea i lenei tausaga 2023, ae e leo mafai ai lava ona ausia le fuainumera o leoleo e tatau ona iai e 1027.
Tau’a e le Komesina o loo tatala pea avanoa mo le mamalu o alo ma fanau o le atunuu o loo iai le agaga e fia tautua e avea ma malu o le malo.
