E leo ausia e le vasega fau’u fou a leoleo le fuainumera o le aufaigaleuga e tatau ona iai.
Na faau’u aloaia ai i le aso alii ma tamaitai leoleo fou e toa 44 lea na faatauto ile aso Lua o le vaiaso nei ile Fale Faamasino i Mulinuu.
Ae o le Komesina o le Matagaluega o leoleo le afioga ia Auapaau Logoitino Filipo na saunoa e faamatala le talaaga o le savaliga a le vasega faauu mai lava ile amataga.
Saunoa Auapaau e toa 50 na filifilia mai ina ua maea le iloiloga o tusi talosaga ma agavaa ai mo toleniga ile 17 vaiaso peitai e 6 nisi o sui na faavae ona o nisi o galuega ae o nisi o faalavelave faaleaiga.
Peitai saunoa le Komesina ile favaa o le galuega faaleoleo e tatau ona oo atu le fuainumera o le aufaigaluega ile 1027, ae ile taimi nei 885 o loo faafaigaluega ina, pea faaopopo atu ma le au faauu fou lenei ona maua ai lea o le aufaigaluega atoa e 929.
Na ia saunoa foi mai lea fuainumera e leo mafai ona ausia ai lava le fuainumera manaomia mo le aufaigaluega ma o loo iai lava le avanoa mo nisi o alo ma fanau o loo fia auai ile galuega faaleoleo.
O alii ma tamaitai ia sa faauu ile aso o nisi na faauu mai ile Univesite o le Pasefika i Alafua ao nisi o le Iunivesite Aoao o Samoa.
E 33 tamaitai ae e toa 11 alii, oi latou ia ua mafai ona faaiu ina ma le manuia aoaoga ma suega sa faagasolo e saili ai le agavaa ma le tele o le silafia ile faatinoina o le galuega faaleoleo i totonu o le 17 vaiaso.
Sa tomua lea faauuga ise sauniga lotu ona sosoo lea ma le saunoaga faapitoa a le Minisita o le Matagaluega o leoleo ma falepuipui le afioga ia Faualo Harry Shuster, na ia ave ai le faamalo ma le faamanatu ile au faauu ia faia le galuega ma le faamaoni i lalo o le tulafono.
Ma ia manatua le tautinoga sa faia i luga o le tusi Paia e fesoasoani le Atua ma le galuega o lea feagai ai.
