“E tau lalata ane i ai”, (Probability), o le upu lea na matua finauina malosi e le loia Samoa i Ausetalia, sa tu mo se tasi o alo Samoa na molia, i ni tuuaiga o lo o faaauau ona lauliliu pea i le Faamasinoga faa itumalo.
O le tuuaiga i lona toe faamalosia ai o sona afafine, ma fanaua se pepe ua atoa le tausaga, i le taimi faatoa 18 tausaga o le afafine o loo tagi.
I le finauga a le Loia Samoa o loo tu mo le vaega tetee, na ia faailoa ai, i luma o lana Afioga i le Faamasino, faamaumauga a le falemai,
1 Na fanau le pepe a lea teinetiti o loo tagi, i le falema’i, ma ia faailoa ai i fomai tausi ma’i, le igoa o sana paaga (boyfriend) na la mafuta i lea taimi, e faapea o le Tamã mo’i lea o le pepe.
Peitai, alua’i le mafutaga ma le boyfriend faa le tonu, ma tetea ai, ae mapuna mai ai loa ma le tuuaiga fou, e faapea, o lana pepe, e le o sona Tamã le boyfriend na la mafuta, ae o lona Tamã moni lava, na toe faamalosia o ia, ma maua ai lana tama teine.
2 I le faatinoina ai o suesuega faa saienitisi a le matagaluega o leoleo a Ausetalia, (DNA test) e faaoga ai le faua o le pepe, le tina, ma lona Tamã mo’i, poo le grandfather o le pepe ua toe tuuaia, mai lea suesuega muamua, na faa le aogaina ai lea mau, ina ua maua mai le i‘uga, e lē tau lalata ane i ai, (negative dna test), le felata’i faia o kenera (Genes), o le Tamã ua molia, ma le pepe ua fanau.
3 Na tei le ua molia, i le moloua atu o lea faaiuga, e aunoa ma se faailoa atu ia te ia, ae toe ave ai le mataupu lava lea i se isi leoleo suesue (another police investigator), ma toe poloaia ai e toe fai se isi suesuega faasaienitisi (another dna test)
4 I le maea o le DNA test lona lua, na faamaonia mai ai loa le telē o le vavalalata (probability) o kenare (Genes) o le Tamã ua molia, i kenare o le pepe, a o lona afafine, ua fanau.
O le feteenai ai o suesuega a le matagaluega a leoleo i Ausetalia i lea mataupu, o se popolega maualuga lea o le loia na tula’i mo lea Alii Samoa, ona mataua’i fesiligia e le loia, le faatinoina faa le tulafono o nei ituaiga suesuega (proper legal processes), ma maua ai, e le’i mulimulita’ia le faatinoina faa le tulafono o le faatinoga o le DNA test lona lua, ma lē mau tali ai le tamaita’i suesue faapitoa, na faatulai e molimau i ana suesuega.
O le isi vaega o le finauga a le loia na tulai mo le Tamã Samoa, e ese ese tulafono i totonu o Setete (States) i Ausetalia, e le faatagaina ai e tusa ma le tulafono, ona faatino le aoina ai o faua (saliva tests), i le isi Setete, ae ave i le isi Setete e suesue ai, fua, i le amai ai o le suesuega muamua e le faamaonia, ae toe faatino le lona lua, ua vavã lalata.
Na maitauina foi e loia na tulai ma le afioga i le faamasino, le lē mau tali, fefe le leo o le tamaitai suesue faapitoa na toe faatinoina le suesueina o le DNA test, ina ua toe fesiligia e le Loia Samoa, pe aisea na faa le aogaina faamaumauga o le DNA test na fai muamua, ae le aumai faatasi ai pea i le faila, sei vaili’ili ai lona ese’esega, ma fesiligia lona faamaoniga, i le faatinoina o le galuega e tusa ma ala faa le tulafono.
I le fesiligia ai e tatou talafou o le susuga o le loia Samoa na tulai mo lea mataupu, o lana tali puupuu ” aua nei talitonuina gofie ni faamaumauga, a ia fesiligia pea lona faatinoga, pe na tusa ma taiala faa le tulafono.
Ua tolopo ai nei lea mataupu mo lona toulaulauina mulimuli, ma maua atu sona taunuuga I tatou tala fou oi luma.
