O loo mata’ituina nei ele Ofisa ole puipuiga o le gataifale, poo le vaega a le Maritime, ni aafiaga ole siosiomaga ile talafatai, mai le vaafagota na osofaia faafuase’i le aau ma amu ole aloalo o Apia, ile po ole Aso Gafua na tea nei.
Talu le sousou o galu ole tai su’e fuefue lea e masani ai lava ona aafia ai talafatai o Samoa, ma isi motu o le Pasefika, afua mai le sootaga va lalata o aave ole la ma le masina.
Peita’i ile tali mai ale afioga ile Minisita o pulega o Uafu ma Malaevaalele, Olo Afoa Fiti Vaai, ina ua tatou fesigia ile malu puipuia o le fuavaa o vaafagota i le uafu i Matautu.
Saunoa Olo, e lua kamupani vaa fagota mai fafo o loo iai ile uafu i Matautu, ua silia ile 10 tausaga talu ona iai na atinae, ma manuia ai foi le tamaoaiga i le lisi, ae o oloa auina atu i fafo, o loo avatu i lalo o Samoa.
Ae o aafiga o le vaa, e pa’u tonu lava ile kamupani, talu o galu aau faanatura.
Saunoa Olo, ua oo atu le tala ole’a toso ese, peita’i o mea faapena e omai le Insurance e siaki, faaletonu ose mea totino ua aafia.
Ae mo le taimi nei, o loo mata’i tuina e le pulega o le gataifale ma le siosiomaga, nei meaane ua mama mai le vaa.
O aafiaga ole siosiomaga e ono faaeteete iai o le mama mai ose suauu, ma nisi chemicals e ono faatamaia ai i’a, ae o ‘amu ma aau ae o isi meaola o le alititai.
O saunoa foi le afioga ile Minisita ia Olo ile tatou faatalanoaga, o se tasi foi lea o galuega mo le kamupani tosovaa i Satitoa Aleipata, na faatoa uma atu ona tatala.
O le afatia ai o vaa afi tetele ile taulaga vaa o Apia, pei ole vaa fagota lea ile po ole Aso Gafua na te’a nei, saunoa Olo, ona o galu aau, ae ole matafaioi a le kamupani vaafagota ole saogalemu o latou mea totino.
Peitai o lipotia ele ofisa faasalalau a le Malo o Samoa, le Savali, ole Vaa fagota lea e lesitala i Vanuatu, a le Yuh Fa Vanuatu Fishery Company Limited, sa faakonekarate mai e le Apia Fisheries Company mo le fa vaiaso lea na uma tonu lava ile Aso Lua na fatia ai i le aau i Apia.
