Ua amata ona fa’aletonu le tino ole tina talavou o taofia i lalo le vaaiga a leoleo ile falemaliu ole TTM Tupua Tamasese Meaole i Motootua.
Ole umi ona taofi ona e leai lava se fomai e faia taotoga faaletulafono e iloa ai mafuaaga ole maliu, pei ona ta’ua ele afioga i le Sui Komesina o leoleo ma falepuipui, Aupaau Logoitino. Filipo.
Tausaga ua tuanai na tupu ai foi le faaletonu lea ole tuai taunuu ose foma’i faapitoa. Ma lipotia ai foi e le au faasalalau le aafiaga lava lea i le Container malulu na teu iai tino maliu..
Peita’i ole tina talavou lea na molimauina le faaoolima iai o lona to’alua i Vailoa Faleata ma maliu ai ma lona ma’itaga ile amataga o Tesema ole 2021.
Ua uma foi ona faatino le ifoga a le aiga o lona to’alua ma talia e le aiga ole tama ole tina talavou, i le afioaga o Vaimoso.
O le maliu lea na tupu ile masina o Tesema o le tausaga talu ai 2021.
Peita’i talu mai lena taimi o loo faaopopoina pea tiga ma mafatiaga ole tina ia Makerita Suamasi Lefao, talu ua iai tulaga faletonu i lona alo a’o faatali ai suesuega a leoleo .
Molimau a le tina ia Makerita, ua uma ona avatu le tusi ile faamasinoga e talosagaina ai se faatatau, mo le faataga ane ole tino maliu e ave e teu, ona o popolega i tulaga lea ua oo nei iai le tino maliu o lana tama.
Peita’i na ta’ua e Makerita e leai se tali tusitusia a le faamasnioga na ia iloa, pau le faamatalaga, e faatali sei uma le sueseuga o loo faia.
O lona manaoga ma lana tatalo a le tina ia Makerita, ua uma le ifoga, a le aiga o le to’alua, o lana tama mai Vailoa, o tuua’ia i lona faaoo ole maliu ia Elisapeta, ma ua tatau ona avane lana tama ma lana pepe e teu, fua i vaaiga ua iai nei.
Peita’i o taualumaga ole mataupu lenei ile faamasinoga o loo teena e le tama talavou le moliga fasioti tagata a leoleo faasaga ia te ia.
Taimi mulimuli na oo ai Makerita ile falemaliu, e asi lana tama, ole tolu vaiaso talu ai, ma ua le mafai ona toe latalata iai ona o foliga faaletonu ua oo iai lana tama ma lana pepe i lona manava.
O saunoa le afioga i le Sui Komesina o le Matagaluega o leoleo ma Falepuipui, Auapaau Logoitino Filipo, “e iva maliu o loo taooto ai ile falemaliu, e leai se malosiaga e latou te faataga ai ona ave i tua maliu, vagana ai ua uma ona faia taotoga faaletulafono.
Ae ole taimi nei e leai se fomai faapitoa e faia lena laasaga. O lo’o iai le maliu mai le masina o Iulai ma Aukuso ole 2021 o loo faatali lava se foma’i faapitoa .
