Ua tele suiga lelei i avanoa o tina ma tamaitai i totonu o galuega faa ofisa ma a’oa’oga, ae e leo tutusa ma paleni i avanoa tau pulega i totonu o faiga nuu ma tulaga maualuluga.
O le aso o loo faasolo ai polokalame a le Matagaluega o tina ma tamaitai e faamanatu ai le Aso faapitoa faavaomalo mo tina ma tamaitai.
Ma saunoa faapitoa ai le Minisita o le Matagaluega le afioga ia Mulipola Anarosa Ale Molioo i le taua o le sao o tina ma tamaitai i totonu o aiga, nuu, ekalesia, faalapotopotoga na soo se saofaiga, e ui o loo iai nisi o faalapotopotoga o loo taotaomia ai le leo o tina.
E tusa ai ma faamaumauga a le Matagaluega e 41% pasene le aofai o fuainumera o tamaitai i galuega faa ofisa, maualuga le fuainumera tamaitai i aoaoga, ae oo mai i tulaga tau pulega ua maualalo e tusa lea ma le 34% pasene tofiga tau pulega.
E faatusa atu i loia o loo galulue i totonu o le fale faamasino e toa 20 faamasino tamaitai, e na o le 30% pasene komiti faatonu, 19% pasene tamaitai o loo i totonu o komiti faatonu a le malo,
I faamaumauga i le tausga e 2020 e na o le 20% pasene o matai tamaitai resitalaina, 41% matai o nuu o tamaitai, ae na o le tolu minisita i totonu o le Palemene e aofia ai ma le afioga i le tamaitai palemia.
Ma o se lu’i le amanaia o avanoa tutusa o tina ma tamaitai ma alii, i totonu o soo se galuega, tofia, saofaiga, faalapotopotoga, poo Matagaluega foi.
O le polokalame foi o le aso e tau aao ai faailoga a fanau aoga sa tauva i le tusiga solo ile taofia o sauaga e faasaga i tina ma tamaitai.
