E $5,000 i le iunite poo le falepuipui foi mo le silia i le lua tausaga le sala e mafai ona tuuina atu i se faleoloa, supamaketi, ma soo se nofoaga o loo latou faatauina oloa taumafa i le atunuu, e aunoa ma ni faamatala e faamatala mai ai se oloa taumafa o loo faatauina atu.
Ua toe faamalosia mai e le Matagaluega o le Soifua Maloloina Supamaketi ma nisi o nofoaga o loo faatauina ai meaai tau taumafa, le faapipiiina lea o faamatalaga manino e faatatau i le oloa o loo faatauina atu i tagata.
Ua afua ona toe faamalosia mai lea tulaga, ina ia malu puipuiia le mamalu o le atunuu mai nei oloa taumafa o loo fefaatauai solo e tagata faatau, e aunoa ma ni faamatalaga e faatatau i le oloa.
Faamanino mai e le Matagaluega o le soifua maloloina, le toatele o nisi o faleoloa ma supamaketi na o latou asia, e leo mafai ona latou usitaia le vaega lua fuaiupu valu o le tulafono o taumafa 2015.
I lea tulafono o loo aofia ai foi nisi faamatala taua e pei o le igoa o lea faatauina atu ai le oloa tau taumafa, uiga faanatura o le oloa, lisi o vaega taua o loo faaaoga e gaosi ai lenei oloa.
Mamafa ma fua sa’o o oloa e iloa ai le tele o le vaega o loo totonu o lenei oloa, igoa ma tuatusi e mafai ai ona fesootai le tagata sa faatauina le oloa ma le sa gaosia le oloa, ma isi faamatagala o loo faatonuina mai e le tulafono faatonutonu.
I le pepa o faamatalaga mai le Matagaluega o le Soifua Maloloina o loo faamanino mai ai, le iai lea o le malosiaga mai le tulafono ona o latou aveesea mai oloa taumafa nei mai faleolo, supamaketi poo soo se nofoaga o loo faatauina ai oloa nei e leo mafai ona usitaia aiaiga pei ona taua i luga.
