Na tulai i luma o le Faamasinoga Maualuga alii talavou e toatolu o loo molia i le faamalosia lea se tamaitai 27 tausaga.
O alii nei e aofia ai Saio Toetu, Christopher Shane ma Steve Fogalele, mai le afioaga o Leone.
Na tulai i luma o lana afioga Fepuleai Ameperosa Roma i le amataga o lenei vaiaso nei, e lei tuuina mai sa latou tali e tusa ma moliaga e pei ona molia ai,
Ae na fesiligia e Fepuleai latou o loo molia pe mananao saili sa latou loia, ona o moliaga o loo molia ai latou e mafai ona nofo sala ai le falepuipui mo le olaga atoa pe afai e faamaonia moliaga.
” Na tali mai Christopher Shane, ” lau afioga le fofoga fetalai, na vave ona saunoa atu Fepuleai, o le fofoga fetalai o loo o le fale o le palemene, ae o le faamasinoga le fale lea e te tulai ai, e le lokaina oe le fofoga fetalai ae loka oe le faamasinoga.
Ma faatonuina e le faamasino sili, a toe sau i le faamasinoga ia iloa le mea o loo agai ai ma ia iloa faaaloalo.
Peitai i faamaumauga a le itu o leoleo, o i latou o loo molia e i le va o le 18 agai le 24 tausaga le matutua, sa latou faia se soligatulafono ( group of rape/ joining rape) i se tamaitai 27 tausaga le matua.
O lenei soligatulafono na tulai mai le masina talu ai ma taofia mai ai latou ina ua sulufai atu le na aafia ma lona aiga i le ofisa leoleo.
Ua tuuina atu le avanoa e le faamasinoga e saili ai sa latou loia ae o le a toe tulai i latou nei e toa tolu i luma o le faamasinoga, i le aso 20 Novema, ma e tatau ona oo atu ile aso 20 ua maua se loia e tulai mo i latou.
