10 Ianuari 2025, Samoa: Tala tuliloa ole mataupu a le FAST ma lana faigamalo, e uma ane lava le ao o ananafi o faatali se tala faalauaitele mai le ofisa o le Palemia, ise taunuuga o lona finagalo e faamalolo le afioga ile minisita o Faatoaga ma Faifaiva, Susuga a Laaulialemalietoa Polataivao Leuatea Fossie Schmidt.
Peita’i ole afiafi po na faato’a iloa ane ia i luga le saunoaga aloaia mai le Susuga ile Laaulialemalietoa,
O ia e lei faamavae mai tofiga Minisita o le Kapeneta, ma e le faamavae foi.
Peita’i le mataupu lea e silia ile ono itula o fale ai le vaega faaupufai a le FAST ile aso Lua, mai le aoauli e te’a ane lava le fitu ile po o avau lava felafoaiga o finagalo ole faafaletui, pei ona molimauina mai e le tatou paaga e sootaga i le pulega o le FAST.
Sa finagalo ai le Palemia e faamavae ese mai Laauli ma le tofiga minisita, ae te’i ane e le’o le finagalo lena o le toatele ole usugafono i lea afiafi mo le na’o le 29 na auai ile fono.
Ma toe lelei ai le mataupu.
Ae o le malama ane o le taeao o le Aso Lulu na toe feiloai ai le Palemia ma Laauli, o iina toe iloa ane ai o loo finagalo lava le Palemia e faamavae Laauli mai le tofiga Minisita.
Ma oo mai ai ananafi, le aso tofi o talia se faaaliga tusitusia mai le Palemia, e po ifo lava e leai,
Ma tatou faalogoina ai loa le saunoaga faalauaitele a le Laaulialemalietoa.
O ia e lei faamavae mai le kapeneta ma e le faamavae foi.
O le a tatou tulimatia taualumaga o lenei aso, ae ua oo mai tala, e toe usu ai se feiloaiga faapitoa a le faafaletui ile aso.
Ae o saunoa Laauli, o le a lava se faaiuga a le tamaitai Palemia, e avane mo ia, ua sauni e talia, ma tapena ai loa le isi laasaga ole agai ile lumana’i.
