Ua faamauina i le galuega fai faatasi a le Fale Sue Toto a le Ofisa o le Soifua Maloloina, ma le auaunaga a le Sosaiete o le Koluse Mumu, le siitia o le fuainumera o le mamalu o le atunuu e autovaa atu i le falemai ma manomia ni paina toto mo le faasaoina o se soifua.
Aua e pei o le lima taumatau lea o le Fale sue toto, o le Sosaiete o le Koluse mumu, o le latou lea auaunaga ua iloa e le toatele o le atunuu ma sulufai atu iai mo se fesoasoani muamua.
E le na o fesoasoani i manuaga mai taaloga ma faalavelave e faatino ai e le Koluse mumu peitai o le sailia o ni paina toto talafeagai ma le gasegase o loo manaomia o le isi lea a latou auauga taua tele.
I le tatou faatalanoaga ma le Peresetene o le Sosaiete le susuga ia Namulauulu Tautala Mauala, na ia faamatala mai ai le faatinoina o le latou galuega e sootaga ma le tagata ua malie e ofo atu lona toto mo le isi tagata.
Na ia ta’ua foi le aofai o paina toto e faaaogaina ma le tatau i totonu o le vaega taimi faatulagaina.
“O le numera o paina toto e tatau ona iai i le pusa aisa oloo teu ai toto i le vaiaso, a maua lava le limasefulu agai atu i luga. Ae manatua foi e eseese ituaiga toto.
“Ae o le aofai o paina toto e tatau ona faaaogaina i totonu o le masina, pe tusa o le toluselau agai i le faselau.”
Saunoa Namulauulu e fua le paina toto ma le ituaiga toto e sue ma ofo atu i le faatonuga a le alii ma le tamaitai fomai e logoina mai.
O loo talosaga mai le koluse Mumu i le atunuu i lea foi fesoasoani ina ia ofoina atu, e faasaoina ai se soifua a fano.
