O Su’a na pulea le polokalame fesoasoani a le ADRA ua manuia ai le faitau fia o aiga lima vaivai o Samoa i falenofo, togalaau mo alagatupe ma le soifua manuia, ae o taumafa.
Peita’i e tuumalo ai ile vaiaso talu ai le Susuga a Su’a ua silia ile 10 masina talu ona malolo mai lana galuega ile ADRA Samoa.
Ae le’i atoa se tausaga talu ona tuua foi le malo, e lona alii, le Susuga a Seiuli Wallwork, o ni auauna ua iloga la la’ua tautua ia Samoa ma ona tagata.
Ma maitauina le solisolimulivae atu ai foi o o la alo.
Peita’i o valevale alofa ma le amanaia ae o le faaaloalogia o le Susuga a Su’a i lana tautua , lea ua atofa ai le sauniga faapitoa ile afiafi nanei, Aso Lua 5 Novema 2024, mai le Ofisa ma le pulega o le ADRA I Samoa, faatasi ma le Ofisa o le Aso Fitu Misiona, e faia i Vaoala ile 6pm .
E oo mai nei ua tusa ma le 19 le aufaigaluega a le ADRA I Samoa o loo manatua pea lo latou taimi o galuega ma le Susuga a Su’a, ae ole ofisa ole Misiona.
O faamanuiaga o aiga I falenofo ma isi auaunaga a le ADRA, ua molimauina le avatu iai ole faamoemoega o le malo, e ala ile faaauala atu iai o vaega tupe, e faafoefoe e le ADRA, le fauina o fale ma isi fesoasoani I aiga lima vaivai.
I le tausaga faaletupe o le 2023-2024 na faasoa atu iai e le malo ose vaega o lana tupe faasoasoa, le afa miliona tala ile ADRA, e oo atu I le 26 falenofo na mafai ona fausia ai..
Peita’I ole tausaga faaletupe lenei 2024-2025 na folafola ai foi lesi vaega tupe mo galuega faatino a le ADRA, ae maise ai lava le fausia lea o falenofo mo aiga o loo agavaa I lena foi faamanuiaga mai le malo o Samoa. O loo galulue faatasi ai le Matagaluega o tina ma tamaitai ma aga fesootai, ma le ADRA o Samoa.
O le sauniga faaleaiga ole Susuga Su’a e ese mai ile afiafi nanei male ofisa o le ADRA Samoa ma le Ofisa o le SISDAC Misiona, lona sauniga faaleaiga I le Aso Tofi, ma ona toe sauniga ile Aso Faraile ole vaiaso nei i le malumalu ole Aso Fitu Misiona i Lalovaea
