Ao talia ai se lipoti lata mai o aafiaga o Samoa ile koviti, ae o loo faamauina le taofia ose pepe tasi tausaga le matua i le potu tigaina ole falemai tele Motootua, i aafiaga o le niumonia e sootaga ile koviti 19.
I le faatalanoaga a le Leitio Polenisia ma le faaulu o le falemai o Tamaiti, e ui o loo faanofoeesea ai ile fale, Papalii Dr Tito Kamu, na ia faamaonia, o loo faia feutanaiga ma le falemai tamaiti i Niusila, i le togafitiga o le pepe lea.
E tolu aso o tulaga tigaina, ae ua faasolo ina iai suiga peita’i o loo iai lava aafiaga. O le limonia i lana tala, e aafia ai ala ea, o le mama, ma afua ai le tale, vevela, fa’amaalili ma faigata ona manava, e afua ona o siama ua sao atu i totonu.
I faamaumauga a le Matagaluega o le aso 7 o Aperila, ua oo atu i le 198 le aofai o pepe , 4 tausaga i lalo ifo le matutua ua aafia i siama o le koviti.
Ae le’o aofia ai aiga o loo fai lava a latou suega i le fale, ma faanofoesea a latou fanau, ua aafia ile siama, e le’o lipotia ile falemai.
O fanau mai le 5 -11 tausaga le matutua e tatau ona fai tui, e 40,638, ae ua oo atu ile 37,394 ua uma tui muamua, ae na’o le 2,733 ua fai tui lona lua.
