Ua faamaonia mai e le loia a le Matagaluega o Alamanuia Pisinisi ma Leipa le susuga ia Faalogo Ioane Okesene, e mafai ona sili atu ma le afe tala le mamafa o le sala tupe e mafai ona tuuina atu e le Matagaluega i soo se faleoloa poo se fai oloa e faamaonia le le usitaia o tau o oloa na tuuina atu ma le tau o loo latou faatauina ai na oloa.
I le tatou faatalanoaga ma le loia a le Matagaluega a le MCIL na ia saunoa ma faamanino mai ai le mamafa o le faasalaga latou te tuuina atu pea maua na gaioiga faa solitulafono.
“O loo asiasi i faleoloa le taimi nei le Matagaluega, a faapea e maua atu e ova le tau o oloa ma le tau na tuuina atu i le lisi ia ua fai iai suesuega ma fai le faasalga, e mamafa le faasalaga,”
Na faamanino foi e le loia, e mafai ona fesoasoani le matagaluega i se feteenaiga a le mamalu o le atunuu e tuuina atu e faasaga i tau o oloa a se faleoloa.
E ala i le tuuina atu o se tusi faasea ma lisiti o lau faatau sa faia i lena faleoloa e faamaonia ai lau faasea, ona faigofie ai lea ona toe agai le Matagaluega e faatino le toe suesueina o tau o oloa na tuuina atu.
“O le isi faiga, o le mai o lau faasea faatais ma le lisiki aua ga iai le aso ma le tau, faigofie ai i le Matagaluega ona toe o asia, ae pei o se mau mau tutu o le aumai o le lisiki ma lau tusi faasea e faigofie ai ona faatino le galuega”
O loo faasolo galuega a le Matagaluega i le taimi nei e mataitu vaega uma e pei ona taua i luga, ae o le fautuaga a le Matagaluega ia usitaia le tau o oloa na tuuina atu e faatau ai oloa i le mamalu o le atunuu.
