Ua fautuaina malosi mai e le Matagaluega o Pisinisi Alamanuia ma Leipa le mamalu o faioloa uma, faioloa siiatoa, ma failoa faatau taitasi, o loo faatauina oloa i le mamalu o le atunuu, ia ia taofia nei loa faiga le talafeagai, o le siitia o le tau o oloa poo le faatauina o oloa i tau maualuluga e mafua mai i le sioki o oloa i le atunuu.
Ma o se solitulafono le faatauina atu lea o oloa i se tau maualuga e ese mai o loo faatulagaina i le poloaiga i le pooaiga faatonutonu o tau o oloa.
Ua silia ai nei i le tolu vaiaso o sioki lava le tele o oloa, e pei o le moa, suka, aniani ma nisi o oloa e manaomia e le atunuu mo le fofoga taumafa.
Peitai ua avea ma auala ua sii maualuga ai e nisi o faleaiga ma faleoloa tau o oloa ma meaai taumafai o loo gaosia mai oloa o loo sioki.
E pei ona faamalamalama manino e le faleoloa siiatoa a Ah Liki i le vaiaso ua mavae, o le tuai mai ai o a latou oloa o loo sioki, ona o nisi o faafitauli o loo feagai ma vaa la’u oloa e pei o le sou o le sami ma le faaletonu o le tau.
O le isi vaega o loo faamalosia mai e le Matagaluega o Pisinisi Alamanuia ma Leipa o le faapipii lea o tau o oloa o loo faatauina ai i fata o loo iai nei oloa.
Ma ua iai fautuaina mai foi le mamalu o le atunuu ina ia lipotia atu faleoloa ma le au fai oloa o loo faatauina oloa i se tau le talafeagai e tatau ona faatau ina ai na oloa.
