E tasi lava le sui tauva a le FAST mo Gagaifomauga 2

SHARE NOW

Na maua le avanoa e faia ai le fesagaiga a le Taitai fono o le FAST Laaulialemalietoa Polataivao Leuatea ma matai mai Safune ile taeao o le aso Tofi 12 Me ile ofisa o le FAST i Tuana’imato.

O le Aso Tofi lea e amata ai ona lesitala aloaia suafa matai o Gagaifomauga 2 e fia tauva i le tofi faipule ole itumalo, o loo avanoa ai nei talu ona tuua le malo ele Susuga Vaele Paiaaua Iona ile masina o Mati.

Peita’i na saunoa le taitaifono o le FAST, e le’o vavaoina e le FAST le paia o matai o fia tauva, ona o le aia saoloto lena a le tagata lava ia. Ae ua tuu atu foi le avanoa i le masii mai a Safune e faatalanoa ai ma lesi foi sui faatu mai Safune lava, ona o loo sosolo pea le FAST i lana mau, o le tasi le itumalo tasi foi le matai poo le sui e tauva mai ai.

O le Susuga a Falesaopule Vaialia Iosua ma le Susuga Lomia Tauloa Moafanua Safuneituuga Siaaga , lea ua ave iai le avanoa e le FAST e faatalanoa ai latou poo ai e tasi iai ona toe logo ane lea.

Peita’i, na faamautinoa mai foi ele Taitai fono, ua uma ona ave le ioega al e FAST ile Susuga Lomia Tauloa Moafanua Safuneituuga Siaaga e fai ma ona sui tauva ile faalagamaea a Gagaifomauga 2. Ma ua avatu foi le tuualalo ile masii mai a isi sui fia tauva i le faamalu o le FAST, Afai lava e alolofa moni ile Malo, ia faaali e ala ile lagolago ile sui a le FAST lea ua iai.

O molimauina mai o loo iai foi isi matai mai le afioaga o Samauga ua oo atu i le vaega faaupufai a le HRPP e tauva mai ai. O le Aso Faraile nei e tapunia ai le lesitalaga o suafa o matai tauva mo le nofoa e tasi o le itumalo o Gagaifomauga 2, mo lana palota laititi ile aso 3 oIuni.