O faanoanoaga ole Fofoga Fetalai ole Palemene a Samoa, Susuga Papalii Li’o Taeu Masipa’u, ua ia faalauaitele mai e ala ile Pepa o Faamalaga mai lona ofisa, ile aso ananafi, lona tuuaia ai ni lafoga a le taitai ole itu agai, HRPP, Tuilaepa Sailele Malielegaoi.
O saunoa Papalii e ala ile pepa o faamatalaga mai lona ofisa, ua tuuaia e Tuilaepa le faatinoga o lana galuega, e ala ile faaaogaina o Pepa o faamatalaga faalaua’itele poo Press releases.
O na faasalalauga a Tuilaepa pei ona saunoa Papalii, ua tuuaisese ai le faatinoga o Pepa o Faamatalaga mai le Ofisa o le Fofoga Fetalai, faatasi ma faasalalauga ua ta’umamaina ai le mamalu o le Nofoa.
E talitonu le fofoga fetalai, ua tatou soifua ai nei ile vaitau, e tatau lava ona faaaoga auala talafeagai e faalauiloa ai mataupu mo le silafia lautele.
Ma o le sa’olotoga foi lea ole Fofoga fetalai e faalauiloa ai mataupu, e ala ile Pepa o Faamatalaga, i auala eseese o loo faaaoga e le atunuu, talu e leai ni noataga poo ni tulafono e faasa ai ona faalauiloa e le fofoga fetalai ni mataupu e tatau ona silafia ele atunuu lautele.
Saunoa foi Papalii, e le afaina lona tagata, ae ole Nofoa ole Fofoga fetalai, ose tofiga faalefaavae, e tatau i faipule ona faaaloalogia.
