E taua tele le aia tatau o soo se tagata faatau

SHARE NOW

Ua atoa ai nei le 26 o tausaga talu ona faamamaluina i Samoa le aso faapitoa e faataua ai le aia tatau o le tagata faatau, ma ua avea ai lava le aso 15 o Mati o tausaga taitasi ma aso faapitoa mo lenei faamoemoe taua.

E pei ona faamanatu ai e le Matagaluega o Alamanuia Pisinisi ma Leipa i Salelologa Savaii i le faaiuga o le vaiaso, ma ua soo ai Samoa atoa i faalauiloa a le Matagaluega.

O na polokalame faalauiloa sa vaevaeina i vaega e lua, e pei o le muamua o le Faalauiloa o auaunaga a le Matagaluega.

O le unaia ma siitia le silafia ma le malamalama’aga o le atunuu aemaise tagata faatau ma le au faipisinisi i mataupu e aofia ai; fefaatauaiga talafeagai ma faiga faatauvaga, aiā tatau po’o matafaioi a tagata faatau, faioloa ma pisinisi, ma le resitalaina o pisinisi.

O le isi vaega lona lua o loo ave ai le faamamafa a le Matagaluega o le Faalauiloa lea o Aia Tatau a Tagata Faatau.

I le pepa o faamatalaga o loo faamanino mai ai o lea Aso Faapitoa sa ulua’i faamamaluina mai le tausaga e 1962 e se tasi o Peresetene ta’uta’ua o le malo o Amerika, o John F Kennedy.

Ae o le tausaga e 1998 na amata faamamaluina ai i Samoa lenei aso faapitoa ina ua pasiaina le Tulafono o Fefaatauaiga Talafeagai lea ua suia nei i le Tulafono o Faiga Faatauvaga mo Fefaatauaiga ma le Puipuia o Tagata e Fa’aaogaina Oloa ma Auaunaga 2016.

O le Minisita o le Matagaluega o Alamanuia Pisinisi ma Leipa le afioga ia Leota Laki Lamositele Sio na saunoaga faapitoa e momoli le faamalo ma le faafetai i le au fai pisinisi ma auaunaga eseese mo lo latou sao taua.