Molimau le faipule o Salega, Olo Afoa Fiti Vaai ile tele o tagata maliliu o loo i totonu o lola palota sa faaaoga ile 2021 o le tulaga foi lena na molimauina i le lola a Gagaifomauga Numera lua, e le taumate na tupu foi i isi itumalo.
Peita’i ole tala a le ofisa i lena taimi, e tatau lava ona iai se faamaoniga mai le aiga ole tagata ua maliu, ona faatoa mafai lea ona aveese ma le lola.
I le palemene o ananafi, na lanutasia ai popolega o faipule o le HRPP, ile fuafuaga a le malo o iai nei e teuteu le tulafono o faigapalota, ia mafai ai ona palota mai tagata i fafo i le palota tele o lumanai ile 2026.
O le mana’oga lena o le FAST ma ua atagia le taunuu lava ina ua ia maua le aofaiga o palota e suia ma pasia ai se tulafono ile maota.
E ui ina popole le faipule o Vaimauga ile taimi e le lava, ma le system o iai, ae ole popolega foi lena ole faipule o Aleipata, ma Faasaleleaga numera lima.
Na filemu manino le tali atu a le faipule o Salega, ua tula’i mai le faiga fou e sootaga ai ma le matagaluega o le soifua maloloina, faapena foi i tagata maliliu i tua, o loo iai le Fono Faavae a itumalo.
Na faamanatu foi e le Minisita, Leatinuu Wayne Sooialo ile faipule o Faasaleleaga lima, Susuga a Peseta ma ona ia foi atugaluga, ile fai uma e le faipule o le galuega, e la’u tagata palota e lesitala ma faapalota.
Saunoa Leatinuu: “Ua uma na sui le tulafono lena, e le toe o Savaii o nonofo i Upolu e palota i Savaii, ua mafai ona palota latou iinei, ua uma ona sui.
Maitauina ile fono o ananafi, e le’i faatemeteme talifuaitau atu a Minisita i atugaluega masani ai mai palota ua mavae, a faipule ole HRPP.
E toe talanoaina ai lea tulafono ile maota ile aso.
