Na talia e se vaega o le fanau a Faasalafa lana faatoesega ananafi, ile ofisa o le falepuipui i Tanumalala.
O Faasalafa o loo tuli lona faasalaga soloatoa ile falepuipui ina ua faamaonia ona moliaga o le maliu ai o le la tama teine ia Rosemay ile silia ma le 10 tausaga talu ai. Na faasala faatasi lava ma lona to’alua o lena taimi ia Faafetai.
E to’alima se vaega o le fanau na alu le latou asiga ile amataga ole vaiaso nei i Tanumalala e aofia ai ma lana pepe e falepuipui faatoa tolu tausaga le matua.
Le alii o Filiga Randoph. O Filiga na vaetama e le tamaitai o Brooke Randoph ua ono tausaga, ma faatoa toe vaai lava lea i lona tina ia Faasalafa , ile 15 ai nei tausaga o lona matua.
Pe tusa ole afa itula o fesaga’i lelei lava Faasalafa ma Filiga, e na’o foliga le mautonu na vaaia ile atalii.
Peita’i sa nofo ai lava i ona autafa lona tina le tamaitai palagi Amerika. fesagai atu iai ma lesi vaega e toafa ole fanau,
lua teine ma tama e lua, ua matutua uumi atu nai lo latou tama ia Faafetai.
O Faafetai na nonofo faatasi mai ma Faasalafa i lesi itu o le laulau. Peita’i o a la tamaiti ia sa i lalo uma lava o le vaaiga a le Toomaga mo e Puapuagatia, Samoa Victim Support Group i Tuana’imato ma toe o i tua ina ua matutua. E aofia le tamaitai o Ainesly , Mele, Tanielu ma Kolio, e ese mai lesi to’alua ua matutua foi , na vaetama foi i Amerika, ma manuia ai o la’ua foi olaga.
Peita’i i le faatoesega a le tina ia Faasalafa, na ia talanoa e faamalulu i ona” taimi na misi ile tausiga o outou, aemaise o taimi o ma’i ma puapuaga, sa mana’omia ai se tina, ae le’i iai.
Ae o le faafetai ile Atua, i le tuuavanoa , e talitonu e mafai ona toe faaoso e le Atua le la i lo tatou aiga, pei ona iai i aso o tou laiti. O le aso lenei ua faia e le Alii, e avatu ai se tala a le tina.
Pe sa’o pe sese le mea ua falepuipui ai ma’ua, ae ole faamaoni e taua , ia fai ma’ua ma faataitaiga i le mea ua tupu, aua nei iai se isi o outou e ui , i auala ia ua la iai, ae ia maua le faamaoni. Ma ia maua pea le ola o outou fanau” faapena foi iai la’ua o matua.
O le to’a lima o le fanau lea na faatoese iai Faasalafa na molimauina le tele ose suiga i o latou foliga vaaia i le uma ane o le faamaulaloga a le latou tina, ma toe maua ai se agaga o le feofoofoa’i mulimuli ane.
O le tama ia Faafetai, o loo tuli lona faasalaga i Savaii, ae o Faasalafa o loo tuli lona faasalaga i Tanumalala. E lei talia lana talosaga ile palola i le atoa ai o lona 10 tausaga , ma faatoa toe agavaa e talosaga ile palola i lesi 10 tausaga pei ona ta’ua ele tatou paaga mai totonu.
Na faamatala e lana tama teine matua ia Anesly, o ia ua fai ma faamatua, i le latou aiga, o loo nonofo faatasi pea ma ona tuagane e toalua, ae olesi ona uso ia Mele ua fai lona aiga, .
Na maualuga le faafetai a le tamaitai o Anesly ile Pulega o le Toomaga mo e Puapuagatia, aemaise o lona Mama Lina, i le faamaoni. Sa nofo pea ma folafolaga a Mama Lina, e toe vaai lava i nai ona tei ae tago ia e faamaooppo ona tei o loo iinei. Lea ua talitonu lelei ile faamaoni o folafolaga a le Toomaga ia te ia ma nai ona tei..
E toasefulu lua le fanau atoa lava a le latou tina, e aofia ai le toavalu lea sa i lalo uma o le vaaiga a le Toomaga, tolu na vaetama i fafo, pei ona toe foi mai ai lo latou uso pepe lea ua 15 tausaga, ia Filiga Randolph.
Ae o taua e lona tina ia Brooke ile tatou faatalanoaga, o le faalua ai lea ona sau e aumai lana tama e asi mai lona aiga, na omai muamua ile 2017. Ma ua fiafia lava foi e feiloa’i atu i le tina moni o lona atalii. ae o laua e toe foi i le faaiuga o le vaiaso nei.
