E leo tu’u esea e le auaunaga o le Kosena poo le Goshen Trust Services ma le auaunga o le mafaufau o tatou tagata ua iai aafiaga ogaoga o le mafaufau, ma ua oo i le tulaga ua le mafai e aiga ma nuu ona togafitia.
O le Goshen Trust Services poo le auaunga a le Kosena o loo faamautu lea i Moamoa ma ua 13 ai nei tausaga talu ona faia pea le tautua ma le auaunaga a le Kosena.
E ala lea i le toe togafitia o tagata ua iai aafiaga o le mafaufau ma le mafai ai e le auaunga o le mafaufau poo le Mental health i Motootua ona togafiti, ina ua oo le gasegase i tulaga ua lamatia ai le soifua o le mamalu lautele ae o ia lava. E ala lea i le faaupegaina i aupega matautia, laulauvavale ma le savavali telenoa sei tulou.
Taua e le alii fomai o le Mental Health mai Motootua le susuga ia Seiulialii Dr George Leao Tutitama o i le Kosena ua fai ma sulufaiga o le mamalu o le atunuu Aemaise lava aiga o loo iai o latou tagata ua vaaia le iai o aafiaga ogaoga o le mafaufau ma le mafai ona latou faia ai se isi gaioiga, a avatu foi la le tagata lea i le Mental Health i Motootua e le mafai foi ona vaoia Ona tuuina sao atu loa i le nofoaga o le Kosena i Moamoa mo le faia ai o togafitiga ma aoaoga.
Peitai o luitau pei ona faamatala e le alii fomai, o le tele o isi gasegase e oo atu ua te’a ma le afioaga, pe ua le toe mananao ai o latou aiga. Ma o nei foi gasegase na tuuina atu ma faia ai le galuega mo le lua masina, ua mafai ona toe faafoisia le malosi ae ua iai aafiaga tumau e pei o le galogalo o mea ma le le toe mafai foi ona fiatau tusi.
Ae o nisi gasegase ua malolosi ma toe fesoasoani i le auaunaga a le Kosena ua le toe fia o i latou aiga. O loo auina uma mai lava i le Goshen Trust Services i Moamoa gasegase a Savaii ma Upolu nei.
