Ua toe see Samoa i le tulaga 3 i le faatulagana o pine o taaloga o le pasefika ina ua faaopopo isi pine e
sefulu ile maea ai o taaloga ile aso ananafi.
E 7 le aofaiga o pine na mauaina e le au faaali tino poo le vaega o bodybuilders a le atunuu.
E lua pine auro na faamanuiaina ai taumafaiga a le tamaitai o Rosie Matautia, lua foi pine auro na manumalo ai le
alii o Lafaele Aukoso, maua ai le aofaiga o pine auro e 4.
O le pine siliva na mauaina lea e le alii o John Lemoa ma pine apamemea e lua na manumalo ai alii o Jeremy Vaepule ma Petelo Leota
Ae mai i le ‘au afeleti, i le taaloga o le Javelin poo le veloga o le tao.
Na pine apamemea ai le alii o Donny Tuimaseve ma ia faatuina ai se matati’a fou i lana velo e 69.84m le mamao.
I le taaloga o le togi pulu mamafa na sola ai NU'UAUSALA TUILEFANO ma le pine auro ile vaega o
tamaitai i lana togi e 17.34m le mamao.
Ile faatulagana o pine, oloo ‘ai silia ai New Caledonia e 143 le aofaiga o ana pine, 63 pine auro, 41 pine
siliva , ae 39 pine apamemea. Sosoo atu iai Ausetalia e 29 pine auro, 19 pine siliva, 11 pine apamemea
maua ai le aofai o pine e 59.
Samoa lea ua toe se’e atu i le tulaga 3 e 27 ana pine auro, 14 pine siliva ma le 12 o ana pine apamemea ma maua ai le aofaiga o pine e 53. Tahiti o loo ile tulaga 4, Fiti i le tulaga 5,
Solomona e tulaga 6, Papua New Guinea o loo saofai mai ile tulaga 7, Niusila ile tulaga 8, Cook Island oloo ile tulaga 9.
Ae aiaiuli mai ai Marshall Islands ile tulaga 10. E toe 5 aso o totoe o nei taaloga e faagasolo ona taualuga ai lea i le faaiuga o lona vaiaso 2 lenei talu ona
talimalo Solomona i taaloga o le pasefika.
