E 11 gasegase faapitoa e le mafai ona faia togafitiga i Samoa na auina atu i Niusila i le faaiuga o le vaiaso mo le faatinoina lea o a latou togafitiga.
Na faamaonia mai lea e le Sui Palemia le afioga ia Tuala Tevaga Iosefa Ponifasio i lana saunoaga faapitoa i le amataga o le vaiaso nei.
Saunoa le afioga ia Tuala na pasia e le Kapeneta i le faaiuga o le vaiaso le auina atu lea i fafo o nei gasegase.
O i latou nei ua iai i le tulaga faaletonu ma ua manaomia le faia o taotoga ma togafitiga faapitoa ae e le mafai ona faatino i Samoa.
O le vaai mamao a le malo pei ona folasia e Tuala ia oo atu i le lumanai ua mafai ona togafiti lava e Samoa ona tagata.
Ua afua ona maua gasegase nei i Samoa ona o le le faautauta i meaai taumafa e tatau ona tausami ai i le aso.
Poo le tele foi o le taumafa ae ua le mafai ona iai se gaioiga poo se faamalositino e faatino ina ia faaitiitia ai le tino puta, koko maualuga suka, ma le tele o gasegase ua mafai ona aafia ai o tatou tagata ma le mafai ai ona maua se fesoasoani i tatou maota gasegase.
O le fautuaga mai le malo o loo faaauau pea ona faatino le auina atu o tagata o loo manaomia le auina atu i fafo mo se fesoasaoni,
Ae ia alofa i lou tagata ma lou aiga, tausi lou soifua maloloina, ua fautua mai foi le afioga ile sui palemia ina ia faia taifofoga talu ua faamaonia mai e le Matagaluega o le Soifua Maloloina e toe siitia o le aofai o tagata ua aafia i le Koviti 19.