SAUNOAGA A LE AFIOGA A LE SUI PALEMIA, TUALA TEVAGA IOSEFO PONIFASIO- FA’AAUAUINA O POLOAIGA O VAVAO O LE KOVITI 19; Aso Lua, 28 Iuni, 2022.
Ou te faafeiloai atu i lenei aoauli i lau faafofogaaga Samoa, mai tafa e fia o le atunuu.
O ou Paia ma Mamalu o le a le afea e se faamatalaga, aua o Samoa o le fue lavelave, e leai se poto poo se vave na te autalaina. Ae nuunuu atu ia sasaga faatini o tausala i le galuega tausi a le usoga a Tumua ma Pule.
O le viiga o le Atua e le faaitiitia, ona o lona agalelei ma lona alofa tunoa, o loo malu tapu aaoina ai pea la tatou savaliga i lenei vaitau. Malo le ta’i, faafetai le fai tatalo, malo le tapuai.
O loo faaauau pea le tatou galuega e tali atu i le pepesi o le faamai e pei ona taimua ai le Matagaluega o le Soifua Maloloina.
Ua faamauina i le lipoti lata mai a le Matagaluega o le Soifua Maloloina, mai i le aso 19 i le aso 26 o Iuni, 2022, e 129 i latou na aafia i le Koviti 19, ma ua oo atu ai le numera o i latou na aafia i le 14,776, talu mai ona sopo i tua le faamai i afioaga i le aso 17 Mati, 2022.
I o tatou tuaoi faavaomalo, e 125 tagata na faimalaga mai talu mai le amataga o le Koviti na aafia; ma na o le toalua pasese na aafia o i latou na faimalaga mai i le aso 21 Iuni, 2022. O le aofai atoa la o tatou tagata ua aafia i le Koviti 19 e 14,901.
O le toatele o i latou na taofia, ua toe te’a i tua i o latou aiga, mai i le 283 o i latou sa taofia. E toe toatasi o loo faanofoesea i le falemai i Motootua, ae e leai se isi o iai i le potu tigaina.
O le aso 20 Iuni, 2022, na maliu ai se alualutoto e tasi le tausaga le matua, ma o le uluai pepe foi lea ua maimau lona soifua ona o faigata o lenei faamai. E avatu ai pea faamaisega a lo tatou Malo, ina ia faamafanafanaina e le Atua, aiga, o matua ma fanau o i latou e toaluasefulu ma le iva (29), ua maliliu i le Koviti 19.
E 153,386 suega o le Koviti ua maea na faatino i le atunuu, ma o loo faaauau pea. O loo faaauau pea a tatou tuiga i le taimi nei i falemai faaitumalo uma i le atunuu, atoa ma nofoaga masani o loo faatino ai tui i le Falemai i Motootua. O lea foi ua faagasolo a tatou tui lona tolu (booster) mo i latou e i le 12 – 17 tausaga le matutua.
Ua amata foi ona tuuina atu le tui lona fa mo i latou uma e i luga atu o le 18 tausaga ua atoa le 4 masina talu ona maea le tui lona tolu.
O le mea moni, o le tui puipui, o le fesoasoani tele lea mo le puipuiga o tatou uma mai le faataotolia i le falemai ona o auga ogaoga o le faamai, ma faaitiitia ai le tulaga o le faaono maliu ai. Ua faamauina, o le toatele o i latou na aafia ma ua toe faafoisia le malosi, ua uma lelei o latou tui puipui.
E pei ona faailoa atu muamua, o loo ua iai le fuafuaga e toe tatala o tatou tuaoi faavaomalo, e amata atu i le aso 1 o Aokuso, 2022. O loo tapena le Matagaluega o le Soifua Maloloina i le faamaninoina o vaega moomia mo le tatalaina o tatou tuaoi faavaomalo.
O le aso ananafi na iloilo ai e le Kapeneta isi laasaga mo poloaiga o vavao mo le atunuu. O vaega tupito sa iloilo toto’a e le Kapeneta, na faavae i le tulaga ua iai nei le faagasologa o a tatou tui puipui ma le tuu itiitia ua matauina, io tatou tagata e aafia i le pipisi o le faamai. O le tuu itiitia o i latou e aafia e aofia ai ma i latou e faimalaga mai, o se tulaga lelei lea mo Samoa, aua o ata lafoia ia o le malu puipuia o lo tatou atunuu ona o a tatou tuiga aemaise o le tausisia pea o a
tatou puipuiga lautele faasoifua maloloina.
O vala taua ia sa auliliu e le Kapeneta ma taunuu ai i lana faaiuga e faapea:
E faaauau ona iai pea le atunuu i le laasaga muamua (lanu samasama) o le puipuiga mai le faamai mo le isi fa (4) vaiaso e afua atu i le vaeluaga o le po nei, Aso Lua, 28 Iuni 2022 e oo atu i le vaeluaga o le Aso Lua, 26 Iulai, 2022. O le a talafeauga lenei suiga ma le faamoemoe e tatala o tatou tuaoi faavaomalo, mo femalagaiga i le aso 1 o Aokuso, 2022.
E tumau pea le gasologa o puipuiga o iai nei lea ua tatala ai le atunuu i itula masani ma le faagasolo o le taliu mai o o tatou lava tagata, a o sauni atu i le tatalaina o o tatou tuaoi faavaomalo. O loo faaauau pea aiaiga e tatau ona faamalieina, ina ia mafai ona tuuvaa mai o tagata mai i atunuu mamao.
- O itu ua fetuutuunai e le Kapeneta, o loo agai tonu i le teutuega o puipuiga faasoifua maloloina mo i latou e taunuu mai i le atunuu. O nei suiga e aofia ai le:
- 1. Faaauau le faia o tali fofoga i taimi uma;
- 2. Faatumu lelei le Pepa Faatumu a le Soifua Maloloina lea e tufatufaina i totonu o le vaalele a’o lei taunuu mai i Samoa – ia manino ai se numera o le telefoni ma se tuatusi email poo le Facebook foi mo ni fesootaiga e moomia ai;
- 3. O pasese uma e le iai ni aafiaga, e LE TOE faanofoesea i o latou aiga;
- 4. Fautuaina le faaeteete i nofoaga e agai iai, ma vave vaai se fomai pe a aliae mai ni auga o le faamai;
- 5. E ao i pasese uma ona faia ni a latou suega o le koviti (Rapid Antigen Test) pe a mavae aso e lima (5), ma e tatau ona faia i se falemai poo se nofoaga faasoifua maloloina;
- 6. O pasese uma e aafia pe a mavae aso e lima, e tatau ona faanofoesea i aiga mo le fitu (7) aso ma e tatau ona toe faia lana suesuega i le aso lona fitu (7).
Samoa e, o loo tatou folau pea ma luitau e ui ina tatou folau malie i le laula’i o Matamatagi a o vavala mai ata o Tauleleia.
E leai so tatou malosi, po o so tatou poto tatou te malu ai, pe ana le seanoa le Atua o loo tatou auaunai iai. Ua na o le Atua lava na te mafaia mea uma, o Ia na te faatonufolau ma taiala si o tatou atunuu, e tusa ma le taitaiga a lona Agaga Paia ma lona finagalo alofa ia Samoa. O ia foi tatou te tuta ai i aai o matagofie ona lalafo ai lea o taula i Mālolo, ma mapu ane i Niafane.
O le mea lea, ia tumau lo tatou faatuatua ma le mautinoa, pe lutia lava tatou i puava, tatou te mapu i Fagalele. O tua atu foi o le louloua ma le mamafa o timuga, o loo tumau ai pea le susulu o le la o le Amiotonu a lo tatou Atua.
Ia tumau i le alofa tulituliloa ma le finagalo faapaolo o lo tatou Atua, le faigamalaga a le Tamaitai Palemia ma le aumalaga, a o folau mai i le atunuu.
