Ua taufa’i faia faamavaega ma faafetai a matagaluega o le malo, i fesoasoani na o latou maua mai paaga a Samoa i fafo, pei ona iai le Matagaluega o Faatoaga ma Faigafaiva ile aso ananafi, 29 Oketopa,
Mai lana itulau o faamatalaga, ua amanaia ai le sao o sui o le Matagaluega o Alamanuia a NIusila ma le Vaega o Biosecurity NZMPI I tiute faatino i taimi o le taligamālo a Samoa i le vaiaso ua mavae.
E toa ono tagata faigaluega, mai le vaega o Biosecurity a Niu Sila na malaga mai ma fesoasoani i le leoleoina ma le mataituina o le femalagaa’i o tagata ae maise o fa’amomoli e tuuina atu pe taunuu mai i Samoa.
E lua vaiaso na galulue ai nei tamālii fa’atasi ma le Biosecurity Samoa, i le mataituina o le taunuu mai o faauluuluga o Malo ma le au usu fono o le CHOGM 2024, faapea turisi tafafao mai i le Atunuu.
E le gata i lea ao se avanoa taua ua mafai ona maua e le aufaigaluega e fefa’asoaa’i ai tomai ma agavaa eseese ma fa’ala’uaitele ai le silafia e ala i le fa’atinoina o le galuega, i sui o le Matgaluega o Fa’atoaga ma Faigafaiva, aua se Samoa saogalemu mai i aafiaga eseese e mafai ona ofi mai ona o femalagaaiga i va o Malo.
Na saunoa ia le afioga I le Minisita o le Matagaluega, Susuga La’aulialemalietoa Leuatea Polataivao Fossie Schmidt le agaga fa’agae’etia ma le fa’afetai tele ona o le so’oso’o tauau mai ai o le Malo o Niu Sila ae maise ole galulue faipa’aga e leo fa’aitiitia mo Samoa.
Na fa’apea foi ona momoli le fa’amalo i le taitai o le au malaga, le Susuga ia Howard Hamilton, Susuga ia Seumalii Vaai, Sara Schubert, Claire Miliken ona o le naunautaiga e fesoasoani i uso ma tuafafine/tuagane o loo galulue i le Biosecurity Samoa; ma e momoli atu ai le agaga fa’afetai tele ona o galuega lelei; ma ia manuia tele le toe foi atu i aiga.
