Ua momoli faapitoa le faamalo ma le faafetai a le afioga ile Palemia, Fiame Naomi Mataafa, ile laasaga ua oo iai tapenaga a le tatou atunuu, i ana taligamalo ile masina fou o Oketopa, ile fono a taitai o malo ile taupulega a Peratania, ua faia mai ile Pasefika mo le taimi muamua.
Ma saunoa ai le afioga ile Palemia, e amanaia ai le laasaga o tapenaga ua vaaia ile taimi nei, i lana saunoaga tusitusia ua maua ai le tatou kopi, o faapea mai ai,
” Samoa e, e maeu la outou lagolago i lo tatou faamoemoe. Ile matau atu i afioaga ma alalafaga ile itu i sisifo ile malaga mai ile malaevaalele, oloo punoua’i ai pulega mamalu a Alii ma Faipule atoa ai ma tina ma Tama’ita’i, o vaaiga matagofie i teuga o aai ma faoā aai, ose faatupu malosi, ma oloo atagia ai lo tatou lotonuu ma la tatou talimalo e iloa ai si o tatou atunuu. Faafetai tele le galulue, faamalo le tofā. Ole tatalo ma le agaga maualalo, ia alofagia lo tatou faamoemoe, ia mapi pea lo tatou galulue soosootauau, ma ia tatou fai tatalo pea, ia au le Atua ma i tatou. E le fou le talimalo a Samoa- i lana tu ma lana aga i uiga tausili ole laufofoga fiafia, le faaaloalo, le alofa ma le agalelei. O isi vaega uma ole tapenaga i lona faalauteleina olea feagai ma taitaifono o komiti galue mo le faailoaina ile atunuu.
O a tatou tapenaga oloo vaavaalua faatasi ma le ofisa failautusi o malo ole taupulega i Lonatona atoa ai ma le tatou vaega tumaoti ma pisinisi.
Ma e leo itiiti foi le sao taua ole Pulega mamalu a alii ma faipule, o sa’oao ma augafaapae, o faletua ma tausi, aemaise le malosi o nuu ile lagolagoina o lenei faamoemoe.
