E le fou le tufa ga tupe a le NPF lea ua fai ile vaiaso nei, o lana masani ai lava lea i tausaga ta’itasi. Peita’i ua sui le latou faatatau ole 2022, sui le faigamalo ma sui ai foi ma le lautele o le alofa faasafua ole NPF.
Ua atagia ai le mulimulita’ia lava ele faalapotopotoga ole faamuamua a le faigamalo ale FAST, o le ave lea o le “faamuamua i tagata o le tatou atunuu.”
Ua le gata ina tufa atu tupe i le au fai saofaga o le NPF, ae ua aofia atu ai nei ma faalapotopotoga tumaoti ae o tama ma tina matutua ua penisiona soifua, ua avatu iai le tai $50tala a le tagata mo na’o le masina lenei o Aperila.
O se faasiligamalosi na saunoa ai le tina matua ia Ului Iupati, 92 tausaga o Falelauniu, “e faafetaia le faigamalo a le FAST, i le faaopopoga o lana faamanuiaga mo lenei masina.
O lana 50tala ua faaopopo o lesi foi lena faasiliga malosi, ma le fiafiaga mo ia, ao taumafai ai e ‘alo’alo ese ma le faama’i, e le’o iloa pe tau mani a gasologa o le olaga nei, “ pei ona ia saunoa, “ae faafetai i fanau a Samoa i a latou galuega fita, ua tofutofusia atu ai tagata matutua ile faasoa o lo latou fita i tuga.”
Na ia faafetaia “foi le pulega o le NPF ile lufilufi mea lelei. Ma momoli atu ai le faamanuiaga o le Eseta i tina ma tama matutua uma lava o maua a latou ta’i $50tala i lenei masina Pa’ia.”
Mai le silia i le $115afe tagata fai saofaga a le NPF o lesitala suafa, e silia i le $32afe o loo totogi a latou saofaga faaauau.
Peita’i o ta’ua e le pule sili o le NPF, Pauli Prince Suhren, o tagata lesitala uma lava e agava’a i le mealofa 3 pasene cash o latou saofaga o loo iai.
Ae o lesi lua pasene faatoa maua ile masina o Tesema. O le vaega lea o le silia i le 40 miliona tala o tupe o lafoga a tagata lesitala faisaofaga , o sasa ole atoaga o le 50 tausaga ole auaunaga a le NPF.
E oo lava i saofaga e le’o toe alu iai se tupe talu mai Iulai ole tausaga talu ai, o loo aofia uma lava ile faamanuiaga lima pasene.
Vagana ai le tagata faisaofaga ua uma ona tala a latou saofaga, e leai se faamanuiaga e maua. Peita’i e iai le aufaisaofaga ua uma ona tala ae o loo faauaau pea ona teu a latou tupe i le npf, e le’o manino mai le tulaga oi latou na.
Ae ua fautuaina le faaaoga o fesootaiga televae e tala ai tupe i lenei taimi o pepesi ole faama’i koviti.