E le’o tuumamaina e le Matagaluega o Leoleo, falepuipui ma le Ola toe fuataina, alii ma tamaitai sa gaosiina taumafa mo le latou matagaluega, ae o a latou paaga mai fafo.
Ma faalauiloa faalauaitele ai ile latou itulau, le faamalo ma le faafetai, ile aufaigaluega atoa, ile Samoa Police Academy.
Aemaise le vasega na gafa ma le gaseseina o taumafa mo e na galulue ile taimi atoa, ma faamautinoa e soifua maololoina mea tausami.
Faapena ai male tali malo lelei, i a latou paaga faavaomalo, mai Niusila, Ausetalia ma le Pasefika, na lagolago mai ile taimi o le CHOGM.
Ma amanaia ai le sao ole aufaigaluega, sa gapatia ile gaseseina o taumafa o aso uma.
Peita’i i taumafa o le fono pei ona molimauina i le faleie na gatua’i iai tusitala ma le aufaasalalau I Samoa nei ma atunuu mai fafo,
Na molimauina foi le maeu o le felanulanua’i o taumafa eseese, ti o le taeao, taumafataga o le aoauli, o le iputi faaitula ma faapena ai lava mo le vaiaso atoa o le fono.
O le auaunaga ma le talimalo lelei e ala i taumafa ile faleie o le au faasalalau, na faafetaia ai ma viia lena foi vaega ole taligamalo lelei a Samoa.
