Ua teena e le tamaitai ia Tamaalupeluse Silva mai le afioaga o Puipaa moliaga e 6 a leoleo e faasaga ia te ia, e aofia ai ma le moliaga o le gaoia lea o se vaega tupe e silia ma le $245,000 ao avea ma tagata faigaluega o le Kamupani o le Tradepac Marketing Samoa Limited.
O Lupe e atoa iai le toa fa oi latou o loo molia i moliaga lava ia e tasi ma o loo teeena foi e isi tamaitai e toalua o Lagi Autagavaia ma Pelepesite Akeli ma le alii mai Fiti moliaga ua nei.
Na faatolu ona lau le mataupu lenei i luma o le faamasinoga maualuga i luma o lana afioga le faamasino Ameperosa Roma, amata mai le masina ua mavae.
O isi valaauga e lua e lei mafai na tulai ai le tamaitai ia Lupe ma poloaia ai loa e le faamasinoga le tusi saisai mo ia.
Na fesiligia e Justice Roma Lupe pe aisea na le mafai ai ona auai atu i isi tolaulauga o le mataupu lenei.
Ae tali Lupe, na sau i aso ia na valaau ai le mataupu ae na ia alu ma fesili i le resitala ma faapea ifo ai ia te ia, e onosai sei maea atu le mataupu.
Ua tatala i tua le toatolu sa toaaga lava e tulai luma o le faamasinoga i le lua vaiaso ua mavae, ae o lea faatoa tatala i le amataga o le vaiaso lenei le tamaitai ia Lupe.
Ma tuutuuga e faaoo uma ona pepa malaga i le ofisa o le resitala, nofo i Puipaa ma saini i Aso Gafua ma Aso Faraile ao lei ta ina le itula e 12 ile aoauli.
E toe fofogaina mau o lenei mataupu i le Aso 22 o le masina o Aperila o le tausaga fou.
