Ua oo mai leisi laasaga o le sao o Samoa ile faaititia o aafiaga ole lalolagi mai kasa oona, ua afua ai le faalauiloa ile vaiaso nei, o nofoaga e fafaga ai maa o taavale e alu ile eletise, poo le uila.
Ma faia lea faalauiloa ile One UN House i Tuanaimato. lea na faapipii talu ai nei palaka e fafaga ai maa o taavale, i lalo o le polokalame atinae a Malo Aufaatasi, le Moonshot Initiative.
Na talanoa ai Peter Luis o le inisinia ole poloketi, i sui o le Matagaluega o Galuega, e aofia ai le Matagaluega ole va i fafo, Matagaluega o Tupe, Oa faanatura ma le siosioaga, Faatoaga ma Faigafaiva, Pulega o Fela’uaiga, EPC Electric Power Corporation, NUS National University, ma le SQA Samoa Qualification Authority.
O le malosiaga faafouina lea e aofia ai taavale ma vaasami.
O le ituaiga malosi faaeletise lea na tamua ai le Vaa folau o Samoa, ile silia ile 10 tausaga ua tuanai, Vaa Gaualofa. Na malaga faapitoa ai i Niusila, e aveese lona afi faaleoleo sa alu i le penisini, ae faaaoga maa uila e fafaga mai le la.
O se tasi lena o ana misiona ole unaia ole puipuiga ole siosiomaga, ma le faaagoina ole malosi faafouina.
O le auga foi lea o le faalauiloa na faia ile vaiaso nei, i nofoaga e fafaga ai maa o taavale alui le uila, e unaia ai le mama o le ea, ma le siosiomaga, ae ole faataua o ala o feoaiga faalauaitele, pei ona talanoa le sui o le UNDP, Aliona Niculita ile pepa o faamatalaga.
O le Poloketi lea o loo faatupe e le malo o Iapani, ma faalauiloa e le Malo o Samoa, i le la faapaaga ma le UNDP, mo le tuuititia o aafiaga ole ea mai kasa oona.
O iai le fuafuaga e faapipii nisi nofoaga e fafaga ai maa uila o taavale nei i Upolu ma Savaii.
