O le taeao ananafi na tatala ma faalauiloa ai le togiga fou a le Ofisa o Femalagaiga a Samoa i se sauniga na faia i le Ofisa Autu o le Matagaluega o le Palemia ma le Kapeneta i Apia.
Ise pepa o faamtalaga, e faapea e aofia i lenei togiga laei o alii ma tamaitai o le Ofisa o Femalagaiga, o faailoga o tulaga, pine mo le aufaigaluega, atoa ai ma pulou.
Na saunoa le afioga i le Palemia, o le Minisita foi o Femalagaiga e faafetaia lenei galuega, aemaise o le faiga paaga a le Matagaluega ma le Faalapotopotoga o Tulaga Tau Femalagaiga i le Pasefika, na tauala mai ai le faatupeina o lenei faamoemoe.
I lana saunoaga, na ia asiasi ai i le taua o le iai o togiga e iloa gofie ai se ‘au po o se faalapotoptoga, ma momoli mai ai le feau o le maopoopoga ma le galulue so’oso’otauau o e o galulue ai.
E ui e taua nei vala, peitai o le mapo o faatinoga ma le taunapo i auala ma faasinomaga o loo aiaia ai nei matafaioi mo le manuia lautele o se atunuu, e sili atu lona taua.
Sa ia faamalosiau i le aufaigaluega, o lenei togiga o o latou ofutau, ma o se faamanatu mo i latou o le a faaaogaina, ia faataua ma maelega i le puipuiga o tuaoi faavaomalo o Samoa, ina ia malu le atunuu.
Sa fonofaapipii le Ofisa Sili o Pulega – Agafili Tomaimano Shem Leo i le saga matimatiina o le vaai mamao, ma ia tausili pea i le galulue faatasi ina ia mautinoa o loo saogalemu Samoa ma ona tagata, aemaise le puipuia o le atunuu mai soligatulafono faavaomalo.
O le a fesoasoani lenei togiga fou mo le uunaia o le galuega a le Ofisa o Femalagaiga, atoa ai ma tapenaga a le Ofisa mo le talimalo ai o Samoa i le fonotaga a Taitai o Malo o le Taupulega i a Oketopa o le tausaga fou.
