E ui ua leva ona faaaoga i Samoa le 4Gplus, peitai o lea ua faatoa aloaia ona faataga e le malo le ta’u loa ole 5G, ma avatu iai le faatanaga aloaia e faalauiloa faalauaitele ai. Peita’i o iai le fuafuaga a le pulega ole Digicel, ia Anthony Seuseu, e toe faaleleia atili ana pou telefoni o iai nei.
I le faamatalaga faalauaitele mai le Digicel, ole faatanaga aloaia ua avane e le malo, e iai ma ona aiaiga, faaauala mai le ofisa o le Pule Faatonu Regulator, ile faalauiloaina o le 5G, ae o le’a tele sona suiga mo le au fai telefoni. E aofia ai ma faiga e puipuia ai mai ala faasolitulafono o loo faaui mai luga o fesootaiga televave o aso nei.
Peita’i e tele nofoaga ma nuu i le taulaga ae o Upolu ma Savaii, e le’o mafai ona manino ai le tautua a le Digicel, faapena foi ile Vodafone.
E iai vaega ole atu Faleata e fealua’i solo le tagata ma le telefoni, e su’e le pito ole fanua e maua ai se leo poo se ata ose talanoaga.
Ae i Savaii, o le tulaga foi lena pei ona molimauina i Tafua ma le tele o nuu i le faasolo atu i Matu ole motu.
O Talanoa Seuseu ile faapaaga a le Digicel ma le Nokia, o le’a siitia ai le kava a le latou kamupani ile atunuu, faatasi ai ma le saosaoa ole interneti.
Peita’i ole tauvaga a kamupani telefoni, e fua lava ile lelei ole kava ma le saosaoa o loo fai iai le filifiliga a le aufai telefoni ile atunuu.
O loo molimauina pea lava , le faaletonu foi ole auaunaga a le Vodafone i vaega i Matu Sisifo o Savaii, ma faigata ai ona faatino galuega faapisinisi tau fesootaiga, mai na itu ole motu.
Ae ole vaiaso nei lea ua folafola ai e le Digicel, le faatanaga ua avatu e le malo e siitia ai lana auaunaga, e le gata ile saosaoa ae ole kava.
