E 5.5 eka le tele o le fanua e amata mai i le poloka eleele 1098 e aga’i i le poloka 1105 o loo i totonu o le nu’u o Fataloa i Salelologa, lea ua faalauiloa aloaia mai e Peresitene a le Ekalesia Mamona, o lea fausia ai i luga le malumalu tapuai o le Au-Paia o Aso e Gata ai i Savaii.
O fuafuaga mo le malumalu i ata ta’atitia o se fale fogatasi e tusa ma le 29,630 sikuea futu.
O le ta’ita’i o Peresitene Russell M. Nelesone na ia fa’alauiloaina lenei galeuga mo Savai’i ia Oketopa o le 2023 i lana saunoaga i le Ekalesia atoa i le lalolagi, ta’ua ai lona aogā tele fa’aleagaga aemaise le fa’alauiloaina fo’i lea o isi 20 malumalu fou i vaega eseese o le lalolagi.
O le Malumalu a Savai’i Samoa, o le a tu o se Malumalu lona lua lea i Samoa.
O lona Malumalu muamua na i Pesega, Apia, na fa’apaiaina i le 1983.
Ae i le tausaga e 2003 na malaia ai lea Malumalu i le afi ma toe amataina ai le toe fausiaina ma le toe fa’apaiaina o le Malumalu Sa o lo’o tu nei i Pesega, Apia.
O a’a ma le fa’avaeina o le Ekalesia i Samoa e o’o atu i le 1863, ina ua taunu’u mai i Samoa ni Faifeau tala’i se to’alua.
O le fa’atuina o le Misiona muamua i Samoa na fa’avae i le 1888.
O se fa’ailoga lea o atunu’u o le lalolagi na muamua taliaina ma fa’atuina ai lona Siteki Muamua i le 1962 i fafo mai o Amelika.
O Malumalu Paia e tāua tele i le Ekalesia a Iesu Keriso o le Aupaia o Aso e Gata ai, e avea lea ma nofoaga e sulufa’i iai tagata o le Ekalesia
I le fa’atu ai o le Malumalu a Savai’i Samoa, ua fa’atalitali sauniuni ai le aupāia i se fa’aolataga fa’aleagaga fa’amauoaina, ma le fa’asalalauina fa’alauaitele o galuega o le fa’atuatua ua leva ona fa’aolaola ma fa’afaileleina i Samoa ma le Ekalesia a Iesu Keriso o le Aupaia o Aso e Gata ai.
