Faalauiloa se isi la’asaga fou ua ausia le company Wilex, o le gaosia lea sukalati I le koko Samoa.
Na tatala ma faalauiloa ai i le aso ananafi se isi laasaga ua ausia le company le Wilex, o loo gaosia sukalati mai le koko Samoa.
O le koko Samoa o se tasi lea o laau le atunuu e faatumutumu iai lagona o tagata e ala i le ti taumafa peitai o lea ua mafai ona gaosia ai se tasi o oloa poo le sukalati.
Saunoa le Alii pule o le company le Wilex, le susuga ia Nathan Wilson, ” o le sini ia faateleina tatou maketi poo avanoa e maketi atu iai oloa a le au faifaatoaga. Ae o se avanoa foi e faalauiloa atu ai oloa gaosi Samoa nei.
Saunoa Nathan, e silia ma le 200 le au fai koko Samoa o loo latou faipa’aga e ala i le tuuina atu pe faatau atu le koko Samoa. “Peitai o se avanoa lelei lea e faatupu tele ai le fiafia le atunuu e galueina pea le to’to ina o lenei laau o le koko talu ua mautu mai le maketi e faatau ai le koko.”
Na ia saunoa foi o le au fai faatoaga koko mai Savaii lea o loo malosi le auina mai o le koko mo le gaosiaina o lenei foi oloa fou le sukalati.
Ma o lea iai faleoloa i totonu o le atunuu o le a faatauina ai le sukalati i le $3 le Pepa e tasi, ae $10 le pusa, faailoa e le pulega o le Wilex o lea tilotilo i se fuainumera tele o le a tuuina atu i maketi mo atunuu i fafo e iai Ausetalia, Niu Sila ma Fiti ma Amerika, ma le naunautaiga ia aua nei motusia lea avanoa.
O le Wilex e toasefulu ma le lima le aofai o le aufaigaluega ua ma’ea aoaoina i tomai mo le faa’aogaina o masini mo le gaosia o lea taumafa ma e le na o le Koko o loo latou koleti ina mai Savaii ma Apia nei O loo mafai foi ona latou aoina mai le nonu faatau mai upolu ma Savaii ma le ava samoa aua le gaosiaina o nisi foi o oloa.