Fa’aleagaina le faletalavai a le Maria i le afi

SHARE NOW

E tusa o le itula e 6 i le vaveao nei ae leoleoa ma faananati atu taavale a le Pulega o Tineimu ma faalavelave faafuasei, e tineia le afi na faatamaia ai le fale talavai a le Maria i Taufusi.

O le faletalavai lea e sosoo ane lava ma le ofisa faasalalau a le TV3, peitai na o tatou oo atu ma maitauina ai le taumafai pea o alii fuimu ma le Komesina le afioga ia Tanuvasa Petone Mauga e tineia le mu.

Ae ua le mafai lava ona o le vave o le sosolo o le afi, molimau nisi o tagata sa muamua ma matamata ao faia le galuega a tineimu, ua faigofie ma vave le sosolo o le afi, talu ua fai si leva o le faletalavai lea.

E 4 loli fuimu na oo atu ma faia le galuega ae sa maitauina lava le le mate ai o lenei malaia.

E lei mafai ona maua se tatou fesootaiga ma le Komesina o le Pulega o Tineimu ina ia faamautu mai se mafuaga o le faalavelave, talu o loo galue foi ma lana afioga e fesoasoani atu ile aufaigaluega.

Na oo atu foi ma le Matagaluega o malosiaga faaeletise ma fesoasoani e tape le eletise ma uaea ola o loo faaoga e falega uma o loo ile itu ala lea ina ia faiitiitia ai le faafitauli.

Peitai na tatou maitauina foi le sasao ma le talali mai o le afi i totonu o le ofisa malaga o loo sosoo ane lava ma le ofisa talavai.