E leo toe popole Salamumu ma Fagalii i le vaitau lenei o le tausaga, e tele ina timuga, solo ai palapala ma faaleaga ai le tele o auala, ina ua umusa i le faaiuga o le vaiaso nei o la auala mautu ma lelei, na faaalu ina ai le $1.1 miliona tala.
O le auala i Salamumu e 3.295 kilomita le umi, ae 5mita le lautele, e aofia ai ma se alasima/kolosi.
E 7 masina sa faatinoina ai le galuega, amata mai ia Fepuari tausaga lenei, ma fa’amae’aina ia Setema, ma na faatupeina atoa lenei galuega i lalo o vaega tupe ua fa’aagaga mo galuega tetele a le Malo mo le Tausaga Fa’aletupe 2022-2023.
I le pepa o faamatalaga o loo faailoa mai ai o nei auala fou ua ma’ea ona fausia i lona tulaga mautū e aofia ai ma alavai e tafe agai i ai le vai to’a pe a mamafa timuga.
Ma o ia foi galuega sa mulimulita’ia lona fausiaina i luga o aiaiga ma faiga faavae o galuega faatino o auala tetele a le tatou Malo aemaise tulafono mo auala tetele fa’ava-o-malo, ina ia fa’amautinoaina le sefe ma saogalemu mo femalagaa’iga a le mamalu o le atunu’u.
Peitai o le auala i Fagalii e 2.0 kilomita le umi, ae 5m le lautele, e aofia ai ma alavai ma paipa kolosi.
E 3 masina sa faatinoina ai le galuega, amata mai ia Fepuari ma fa’amae’aina ia Me na faatupeina atoa foi lenei galuega i lalo o vaega tupe ua faaagaga mo galuega tetele a le tatou Malo.
O le auala o Fagalii na fausia lea e le Kamupani o le Lucky Construction Ltd, ae o le auala o le afioaga o Salamumu na galueina e le Kamupani a le afioga ia Sula Montini le King Construction.
