Ole faatamala ole pulega ole Lakapi Samoa lea e gafa ma tapenaga a le Manu Samoa i ana taaloga faavaomalo, o atagia mai ile saunoaga a le Minisita o taaloga, Laumatiamanu Ringo Purcell, le mafuaaga ua taofi ai e le taitaifono ma le pulega ole Manu Samoa le malaga taamilo a le Manu Samoa 15 i Europa ia Novema ole tausaga nei. E le gata ina lape le pulega ole lakapi Samoa e aisi ile malo mo se type e malaga taamilo ai, i Europa, ae ua afaina ai foi ma fuafuaga alualu mamao a tama taaalo.
Ile faamatalaga faalauaitele mai le malo, ua tali manino le Minisita o le Matagaluega o Taaloga ma Alaga’oa mo le soifua fiafia o tagata ia Laumatiamanu faatatau ile faasalalauga a le taitaifono ole Lakapi Samoa, Tuilaepa Sailele Malielegaoi, ile leai ose tupe avatu ile malo mo le faamoemoe ” O le mea moni lava ia, tatou te masani lava ile malaga taamilo lea a le Manu Samoa 15 ile Atu Europa i faaiuga o tausaga taitasi, o lona uiga e leo se faamoemoe fa’ato’ā iloa nei, poo ananafi poo le tausaga ua mavae, leai, ole polokalame o ia malaga taamilo mo au faava o malo uma a le lalolagi, pe tusa ma le 12 masina ua ta’oto mai le kalena o taaloga mo ia malaga taamilo taitasi.
Peita’i, e lei avatua lava se talosaga a le Lakapi Samoa peitai e aumai ua fa’ai’ui’u le tausaga faaletupe 2023 – 2024, ma o loo tau fa’asoasoa seleni oloo totoe mai lea paketi i fuafuaga oloo moomia ona ave iai le faamuamua a le Malo i lena taimi.
E aumai la latou talosaga oloo ta’atia foi le talosaga a le ‘au taaalo a Samoa mo taaloga ole Pasefika lea foi sa ave iai le isi $500,000 e malaga atu ai le ‘Au taaalo a Samoa i taaloga ole Pasefika, ma e lei taliaina la latou talosaga ona i Lena taimi e leo toe mamao mae’a le tausaga faaletupe 2023 – 2024 ia Iuni 2024, fa’aopoopo iai ma le fuafuaga a le Malo i lana fesoasoani mo le ‘au masi’i a Samoa i taaloga faava o malo a le Olimipeka i Farani.
Ma e lei taliaina la latou talosaga sa tuuina mai i totonu ole Tausaga Faaletupe mai le 2023 – 2024 lea ua mae’a atu, peita’i e $600,000 sa ave iai e malaga atu ai le ‘au ile taamilosaga ole ipu ole lalolagi ( World Cup ) lea sa faatautaia ia Oketopa a’o Novema ai taaloga ole Pasefika lea na talimalo ai Solomona.
Saunoa foi le minisita e foliga mai ua leaga le malo, ina ua leai se fesoasoani atu, peita’i o lea ua amata foi le tausaga faaletupe fou ole 2024 – 2025 ae e leai se talosaga ua avatua e le Lakapi Samoa mo le malaga taamilo a le Manu i Europa, peitai ole tali atu foi lea a le Minisita o Tupe, afioga a Lautimuia Afoa Uelese Vaai ina ua fesiligia e le ATA – MUA NEWS, ” Leai, e lei oo atu se aisiga a le Lakapi Samoa, faapitoa mo le malaga a le Manu Samoa i Europa ia Novema 2024.
