O le tagata ua faamauina le salamo moni ma le faamaoni i le taimi atoa na falepuipuia ai i le toese i Tanumalala, o le tagata lena ua ave iai le avanoa i lalo nei e toe mafuta atu ai i a latou fanau, aiga ma nuu.
Peita’i e ui ina ua faamagalo i lalo nei ose taunuuga o le fono faatonu a le palola.
Ae e iai lava tuutuuga e ao lava ona latou mulimulitaia, ina faaauau ai pea ona saoloto i tua mai o ‘aupa o le faalepuipui.
Ile faatalanoaga a le Leitio Polensia ma le Komesina o leoleo, Auapaau Logoitino Filipo na ia faamaonia ai.
Ua tatala i tua se vaega oi latou na talosaga e magalo i lalo o aiaiga faapitoa poo le palola.
E lata i le 50 tusi tatalo na oo ane i luma o le komiti palola, peitai e le atoa se 20 pagota na filifilia ma manuia e faasa’oloto.
O lena vaega na faamanuia iai le laulau a le komiti, e aofia e sa molia ile gaoi, talepe fale, ma le fasioti tagata pa’ivalea, ma le taumafai e faaoo le maliu.
Ole vasega o le laulau sa faia le faaiuga, mo e magalo mai i tua i le palola, e aofia le Afioga i le Faamasino o le Faamasinoga Maualuga, Justice Tuatagaloa, Ofisa sili o le Matagaluega o Faamasinoga, Susuga Papalii John Afele,
O le Komesina o le Matagaluega o Leoleo ma Falepuipui, Auapaau Logoitino Filipo, ma isi.
