Ua toe faaopopo ai nei isi sui e toalua ole Vaega faaupufai a le HRPP, ma maua ai lana 22 faipule i le maota pe’a uma ona faatauto lana to’alua.
Ae faaopopo le toatasi a le FAST maua ai lana 31. Ole taunuuga lena ole faaiuga a le Faamasinoga Maualuga.
Faatatau ile talosaga a Aiimalemanu Moti Momoemausu Alofa Tuaau, ma Faagasealii Sapoa Feagiai, faasaga ile Fofoga fetalai o le Maota, Li’o Papalii Oloipola Masipa’u.
I le male: Talosaga a Toomata Nora Leota, FAST, Lolomatauama Eseta Faalata faasaga ile Komesina o Palota, Loia Sili, Aliimalemanu Alofa Tuuau, Faagasealii Sapoa Feagiai, ma le vaega faaupufai a le HRPP.
Ile faaiuga a faamasino, e aofia ai Faamasino Sili, Justice Perese Justice Nelson ma Justice Vaai.
Ole aso 11 o Me 2022, ua faapea mai ai ole tiute Fofoga Fetalai ole faatauto o Aliimalemanu Alofa Tuuau ma Faagasealii Sapoa Feagiai i lalo o le tulafono 44 (1A) (a), 44 (1A)(b) (44)(1B) ole Faavae.
Ole tiute foi ole Fofoga fetalai o le maota, le faatatuo o Toomata Nora Leota ose faipule faaopopo o le Palemene, i lalo o le faavae, vaega 44(1A)(b) ma le 44(1E) ole faavae. O Toomata e faatauto ose faipule faaopoo ole Palemene, ae ua faaleaogaina le la talosaga ma Lolomatauama.
E tusa ai ma le Pule ale Faamasinoga , Ole faatautoga, o loo mana’omia i totonu o le faavae faaletulafono, ma ia faataunuu ise taimi avanoa muamua lava, Ma e leai nisi mafuaaga i luga o le faavae poo nisi lava tulaga faaletulafono, o le ‘a faatuai ai fua ona faataunuu le faatautoga.
Ole taitoalua ai o sui mai itumalo, i totonu o le Palemene e le’o se mea fou. O itumalo tetele sa tai lua faipule i taimi a’o lei suia mai le tulafono fou ua iai nei o le ta’i tasi o faipule a le Itumalo. Peitai ole 10 % tamaitai ile Palemene lea na taufaamalie, ma afua mai ai le toso o le taunuuga o faamasinoga ole faigapalota tele 2021 ma oo mai ai nei.
Ina ua uma ane le palota tele o Aperila 2021 e 5 tamaitai na manumalo mai, ae na toe solomuli lesi faipule tamaitai ma totoe ai le 4. Ma faaaoga ai loa le 10 pasene ole 51 faipule uma ane e 5.1, peita’i na faanumera atoa le .1 ma 6 ai faipule tamaitai.
Ae na lu’i e Toomata le formula na faaaoga , ma finau e manumalo foi tamaitai e toalua a le FAST pe’a faaoga le la formula. Peita’i ua fautuaina e le faamasinoga le Fofoga fetalai, e faatauto , tamaitai e toa tolu o taua i luga, e avea ma faipule faaopopo ole Palemene.
54 nofoa ole Palemene ua iai nei fua ile faaiuga ale faamasinoga, e aofia a ma le nofoa o Gagaifomauga 2 o loo avanoa ina ua tuua le malo e lona faipule. O le Aso Tofi 12 Me ma le Aso Faraie 13 e faaulu ai sui tauva mo le palota latiti ia Iuni 3.
