E vevesi lava ma pisa sasa o tapenaga o le aso Maliu ma le toetu, ae na maitauina ai foi le toe pepesi mai o le flu.
Ma afua ai ona tu’uina mai ai luga le faasilasilaga faaluaitele mai le Ofisa Sili Aoao o le Matagaluega o le Soifuamaloloina le afioga Aiono Dr Alec Ekeroma.
Ma faamaonia mai ai le silia ma le toa 100 fanau laiti na sulu atu ile falemai i Motootua ile vaiaso ua tuanai ona o auga tigaina o le flu, talu mai le aso 5 o le masina lenei.
Ma ia lapatai ma fautuaina mai ai le mamalu o le atunuu e le gata o auala e tatau ona faia e taofi ai le pepesi o le flu e pei o le tausisi le va mamao ma le isi tagata, ma ia mautinoa o lelei le ea fegasoloai. Fai lau talifofoga i taimi uma i nofoaga tumutumu, ma soo se falemai ete asiasi iai.
Mautinoa ia mama le talifofoga ma ia fufulu mama lima i soo se taimi. Ile faasilasilaga faalauaitele lava lea a le Ofisa Sili oloo ia taua ai, e soo se tasi lava e mafai ona maua ile flu.
Peitai oi latou e tele le avanoa e aafia ai ma oo atu ai i tulaga tigaina, e aofia ai tina to, ma e ono maliliuu ai foi tagata matutua, tamaiti laiti ae faapea foi i latou e iai aafiga tumau o le soifua.
Ma oloo fautuaina mai le atunuu e vave vaai le se falemai lata ane pe afai ua aliae ni aafiaga tigaina o le faamai pepesi lenei o le flu.
