Faamanuiaina Valeli i le avanoa sikolasipi mai le JICA

SHARE NOW

E toa ono ia Elisapeta Valeli Malaeulu tama fanau a Samoa o lea tuua Samoa no Iapani i le vaiaso fou ina ua faamanuiaina i avanoa Sikolasipi a le Malo o Iapani tai 2 tausaga.

O nei avanoa Sikolasipi e faalauiloa i tausaga uma, ma ua agavaa ai ni tamaitai Samoa se toa 4 ma alii e toa 2 mai le toa 16 o le aofaiga atoa oi latou sa tusi talosaga.

O Elisapeta ua iva ai nei tausaga o loo galue i lalo o le Komisi o Auaunaga Lautele a Samoa (PSC) ma ua 32 ona tausaga, mai afioaga o Puapua, Lano, Safune ma Vaivase.

Peitai i le tatou faatalanoaga ma le susuga ia Elisapeta na ia faailoa ai e lua tausaga o le avanoa Sikolasipi.

I le faailoga o le Master in Program ma e mafuli lea mataupu i galuega tau ofisa ma pisinisi e pei o le galuega o loo ia galue ai le taimi nei.

Peitai faailoa e le tina ia Elisapeta ua iai le faamoemoe a maea tausaga o le nei avanoa Sikolasipi o lea toe taliu mai ma faamaea le tautua mo Samoa ile galuega o loo galue ai.

Na faaleo uma le agaga faafetai o alo ma fanau nei e toa 6 i le sui o le malo o Iapani ile aso ananai mo nei avanoa sikolasipi ua o latou maua e aooga ai ile Iunivesite o Kumamoto i Iapani.

Oi latou e aofia ai le alii muamua lava lenei ua mafai ona agavaa ile sikolasipi o le PhD le susuga ia Asera Wayne Asera (PhD Program) Elisapeta Valeli (Master Program), Niua Susanna Tavita-Kitiona (Master Program), Anthony Tufuga Tovia (Bachelor Program) ma le auso ia Chrismira Faanaitaua Matatia ma Mary Rose Matatia (Bachelor Program).