O se laasaga ua sili atu ona lagona ai le va lalata o le malo o Niusila ma Samoa ina ua, avea ai nei le afioga a Si’alei Van Toor, ma High Komesina o le malo o Niusila i Samoa.
O le taimi muamua lea ua tofia mai ai se tagatanuu o Niusila ile tofiga Komesina, e iai sona sootaga toto i Samoa, pei ona ta’ua i le pepa o faamatalaga.
Ma ua mae’a talia ai ona tusi tofiga ma aloaia e le Ao Mamalu o le Malo tutoatasi o Samoa, Afioga Tuimalealiifano Vaaleto’a Sualauvi ll, ile sauniga faapitoa na faia i le taeao ole Aso Lua o le vaiaso nei, 6 Fepuari, 2024.
O le va fetausia’i o malo e lua talu mai le Feagaiga faaleuo, Treaty of Friendship ile 1962, Samoa ma New Zealand, e fausia mai le faamaoni, fegalegalea’i, ma le va nofo lelei.
Na saunoa Ms Si’alei Van Toor, o le’a galue va lalata ma le malo o Samoa, ma faaauau ai mai le faigauo na sosolo mai ai.
Ma o le manaoga o Niusila ia fesoasoani ia Samoa i lona tamaoaiga ma le atinaega, ae o le tali atu i suiga o le tau, ma oloo tapena foi e lagolago i lana taligamalo i taitai o malo ole Taupulega, CHOGM ia Oketopa.
I le malelega a le Ao o le malo, na afea ai le aloaia e Samoa o le sao o Niusila, ile atinaeina ole tatou atunuu, mai lava ile soifua maloloina, aoaoga, siosiomaga, taaloga ma galuega tetele.
Ma ia faamanuia ile afioga a Si’alei Van Toor, i lona tofiga , ua ose Komesina sili, muamua lea o Niusila i Samoa, e tupuaga mai Samoa.
O lona tula’i mai, o le a tele ni avanoa ma saga faamalosi’au i le sootaga lea a malo e lua.
Sa galue le afioga a Si’alei i Matagaluega o le Va i fafo, sa failautusi lona lua, i mea tau tamaoaiga ma fefaatauaiga, sa amupasa a Niusila i Beijing 2006-2008, sosoo ane ai ma le aveea ose Sinia o Niusila i Asia i Matu, mo le Matagaluega o le va i fafo.
2009-2013 na tofia ai ma Failautusi muamua ole Tamaoaiga ma fefaatauaiga a Niusila i Beijing, ma tofia ai ose Konesula ile Tamaoaiga ile ofisa Amupasa ile 2013, ma faaauau mai ai e avea ma faatonusili ole Vaega o Pisinisi ma Alamanuia a Niusila, i totonu o Taipei 2014-2017, ma toe foi ane ai i Ueligitone ia Ianuari 2017, e pulea le Oifsa ole itulagi ole Pasefika i Niusila.
I le 2018 sa tofia e fai ma faufautua Sinia ile Minisita o Fefaatauaiga i Ueligitone 2020 fai ma Amupasa o Niusila i Lusia, 2022 faasee ane e nate pulea le Itu o le va i fafo a malo o Europa i Ueligitone, ma mulimuli ane ai fai ma Faufautua Sinia a le Minisita o le va i fafo a Niusila, 2022.
O le aso 1 o Fepuari 2024, na taunuu mai ai i Samoa e suia le Komesina o Niusila ile tatou atunuu, sa tauavea ese tagatanuu Niusila, Dr Trevor Matheson.
