Fa’amanuia ele ta’ita’i ole malo le Eeseta i tagatanu’u of Samoa.
Ise feau tusitusia na saunoa ai le Palemia ia Fiame Naomi Mata’afa e fa’apea e ui i lenei vaitau faigatā o lo’o feagai ma Samoa aemaise le lalolagi atoa ona o le fa’ama’i fa’apea fo’i suiga ogaoga o le tau, ae lē mafai ai ona nātia le agaga kerisiano moni, e susu’e le fa’amalama ma manatua le alofa tunoa o le Atua Soifua.
Na fa’amamafa mai ele tama’ita’i Palemia le Ioane 3 f. 16 -17 mai le Tusi Paia e fa’apea, “auā ua alofa mai le Atua i le lalolagi, ua auina mai ai e Ia lona Alo e to’atasi, ‘ina ia lē fano se tagata e fa’atuatua ia te Ia, a ia maua e ia le ola e fa’avavau.
“Auā e le’i auina mai e le Atua lona Alo i le lalolagi e fai ma fa’asala, a ia avea ma Fa’aola i tagata uma.”
Samoa e, ia tatou maua le loto maulalo ma le agaga fa’atalitali mo le Ali’i, auā o ai ea le tagata fa’atauva’a ua Ia manatu mai ai, ma le tagata ua leiloa ua Ia foa’iina mai ai lona Alo Pele e to’atasi.
Ia manūteleina le fa’amanatuina o le maliu ma le toetu manumālō ai, o lo tatou Fa’aola mai le tu’ugāmau ma le oti.
Manuia le Eseta Samoa!
