E toalua ni sui mai le Asosi o Tagata Logonoa i Samoa ua faamanuia i avanoa Sikolasipi mai le Univesite o le Pasefika i Saute i Fiti mo le lua tausaga.
O se tala fiafia i le amataga o galuega o le Asosi i lenei tausaga 2023, le maua ai lea e latou sui o nei avanoa sikolasipi mo se taimi muamua, le tamaitai ia Maselina Iuta 26 tausaga mai Sataua Savaii, ma le alii ia Mathew Pitovao 25 tausaga mai Vaivase.
Ua faamaonia mai e le Asosi o Tagata Logonoa o ia avanoa sikolasipi e mo i latou e iai aafiaga tumau o le soifua poo le Disability Regional Scholarship.
I le tatou faatalanoaga ma le alii ia Mathew Pitovao, na ia fapea ai , “o ia na aoga i le USP mo le 2 tausaga i le Tipiloma o Fesootaiga i Galuega, ma apply mo le avanoa ua ia maua, na te lei mafaufauina foi olea maua sona avanoa sikolasipi peitai, o se fiafiaga tele mo ia ma lona aiga ina ua maua lenei avanoa e faalauaitele ai lona malamalama, ma ua malilie foi ona matua e tuua lona aiga mo le 2 tausaga ae agai atu i Fiti ma faaauau ai lana aoga i le Tipiloma o Fesootaiga i Galuega.
Ta’ua e le Asosi o tagata Logonoa i se pepa o faamatalaga, o se faitoto’a lea ua tatala mai e siitia ai le silafia i Mataupu oloo aoao e i latou nei, ma e le gata o se fiafiaga mo i laua nei, ma o la Aiga, o le Asosi ae o se mitamitaga i le Atunuu, le maua o avanoa tutusa mo i latou e iai aafiaga tumau o le soifua.
Na faafetaia ai e le Asosi o tagata Logonoa nisi o paaga taitasi ma faalapotopotoga na mafai ona fesoasoani atu ua mafai ona taunuu ai lea faamoemoe ua leva ona moemiti iai.
Toe tolu vaiaso ona tuua lea e Maselina ma Mathew o Samoa mo Fiti mo le amataina o la a’oa’oga.
