Ua oo atu ai nei le fesoasoani a le ADRA Samoa i le vaega tau poloketi o fualaauaina i le Ekalesia Aso Fitu i Paia Savaii.
O nei poloketi pei ona faamauina ai le faitau afe e le gata o Ekalesia eseese o Samoa ua manuia ai o faalapotopotoga tau amata ae o nuu ma afioaga, pea lelei ona faafailele fatu laau o fualauaina eseese ma tamai laau ua tuuina atu mo le faia o lenei poloketi.
Pei ona maitauina ai le faaavanoa ai o taimi ae o le aso atoa lenei o matafale e fitu o le Ekalesia lenei ae potopoto ae ma faia se mafutaga faale aoaoga muamua mai le ofisa o le ADRA Samoa.
Ina ia faamalamalama itu tino uma o lenei poloketi ma le taunuuga ua faaalia e nisi o Ekalesia ma faalapotopotoga na mua’i tapa faamanuiaga e tauala mai i lenei poloketi. Saunoa le susuga ia Asiata Apineru o le taitai o le ADRA Samoa ile vaega o poloketi, e ese mai le poloketi lenei ua faamanuia ina ai le Ekalesia a Paia mai poloketi uma lava a le ADRA Samoa.
Aua e le gata ua ofo atu fatu laau, o tamai laau, ae o mea faigaluega e pei o suo totigilina ma nisi o vaega e manaomia. O le poloketi lenei e na o le 10 Ekalesia sa tuuia mai e filifili atu, peitai o se faamanuiaga ina ua filifilia ai lenei Ekalesia, ae o isi poloketi o loo laugatasia uma ai lava Ekalesia o Samoa o loo talosaga atu.
Taua foi e le sui lenei e leo faailoga tagata, pe faailoga Ekalesia foi le ADRA poo ai e ave ai le faamuamua o loo tuu faasolo lava le ofo fua atu o lenei fesoasoani taua.
O le Ekalesia i Paia e fitu matafale o loo tausavali mai afioaga o Samauga, Faletagaloa Safune, ma le matafale e tasi o loo nonofo i Paia, ae o loo tausia e le susuga i le faafeagaia ia Taeao Apineru ma lona faletua ia Faitele Taeao.
