E toa 13 fanau aoga sa filifilia mai i le ta’amilosaga siisii uamea mamafa a kolisi i nei i Upolu ma Savaii, o loo tolauapi i le falesiisii i Tuanimato mo toleniga aua le tauvaga si’isi’i u’amea mamafa a fanau a’oga a Niu Sila ma Ausetalia.
Saunoa le faiaoga ulu le susuga ia Tuaopepe Jerry Wallwork o fanau foi na, ua maea ona totogi e le Asosi siisii uamea mamafa a Samoa o latou piliaoga, o pasese e agai ai i le aoga ma toe foi ane i le fale toleni, e aofia ai foi le tausiga i meaai ma isi.
O le taimi muamua lea ua maua ai e Samoa se vala’aulia fa’apea e tausino ai alo ma fanau aoga Samoa ma fanau aoga i atunuu i fafo.
Ma ua iai le faamoemoe o le masina o Aperila o le tausaga nei o lea tuua ai e fanau nei Samoa ae malaga atu i Niusila mo lea faamoemoe mo aso e lua.
Saunoa Tuaopepe o le naunautaiga, a uma atu le vaega matutua oloo tauavea le fu’a a le atunu’u i le siisii i le nei vaitau, ae oloo fa’asolo mai fānau nei e fa’aauau le taleni.”
E ui i le pisi o le Asosi i tauvaga tetele fa’avaomalo i le tausaga nei e aofia ai ma taalogao le Olimipeka, ae e le’o fa’atumutumulima ai i le fa’agasoloina o tauvaga e ātina’e ai pea le tāleni si’isi’i u’amea mamafa, i totonu o aoga i le atunu’u.
